Urukiko rw’Ikirenga mu Bushinwa rwakuyeho igihano cy’urupfu ku munya-Canada uregwa gucuruza ibiyobyabwenge, nk’uko umunyamategeko we yabitangarije ibiro ntaramakuru Reuters kuri uyu wa mbere.
Ibi ni intambwe mu mubano hagati y’ibihugu byombi birimo kugerageza gusubiranya imibanire yabaye mibi mu myaka myinshi ishize hagati ya Ottawa na Beijing.
Robert Schellenberg yatawe muri yombi mu 2014 ashinjwa kwinjiza ibiyobyabwenge mu Bushinwa, mu 2018 yabanje gukatirwa gufungwa imyaka 15.
Mu 2019, ubwo umukuru w’uruganda Huawei rw’Ubushinwa yafatirwaga i Vancouver muri Canada ku nyandiko zo kumufata zatanzwe na Amerika, Ubushinwa na bwo bwahise bukatira Robert urwo gupfa.
Ku wa gatanu, Urukiko rw’Ikirenga rw’Ubushinwa rwakuyeho iki gihano yari yarahawe n’urukiko ruto kuri uru, nk’uko umunyamategeko Zhang Dongshuo w’i Beijing yabibwiye Reuters.
Urukiko rw’ikirenga rwohereje urubanza rwa Robert mu rundi rukiko ngo rusubirwemo.
Ibi bibaye hatarashira ukwezi Minisitiri w’intebe Mark Carney wa Canada asuye Ubushinwa mu ruzinduko rw’iminsi ine, aho ibihugu byombi byemerwanyijwe kuzahura umubano wabaye mubi ku gihe cya Justin Trudeau.
Umuvugizi wa minisiteri y’ububanyi n’amahanga ya Canada yabwiye Reuters ko bamenye icyemezo cy’Urukiko rw’Ikirenga kandi bazakomeza guha ubufasha Robert Schellenberg, nubwo nta byinshi yarengejeho.
Wa munyamategeko Zhang we yagize ati: "Uhereye ku byavuzwe n’abategetsi bombi nyuma y’uko minisitiri w’intebe wa Canada asuye Ubushinwa, mpereye ku bunararibonye bwanjye birashoboka cyane ko icyemezo cy’Urukiko rw’Ikirenga gishingiye kuri ibi".
Gusa avuga ko amahirwe ko Robert amaherezo azarekurwa yo akiri macye, ahereye ku bukana bw’igihano yari yahawe.
Umwaka ushize abanya-Canada bane mu Bushinwa bakatiwe urwo gupfa kandi baricwa, nk’uko Canada yabivuze.
Ubushinwa kandi mbere bwafunze abanya-Canada babiri baregwa ubutasi, baje kurekurwa mu 2021.
