Iran: ‘Couple’ yakatiwe gufungwa imyaka 10 ‘kubera video barimo guceza’

Umusore n’inkumi bakiri mu myaka 20 bakatiwe gufungwa imyaka yose hamwe 10 nyuma yo gutangaza amashusho yabo barimo guceza mu muhanda.

Biravugwa ko urukiko rwabahamije bahamwe n’ibyaha byo gushishikariza ruswa, ubusambanyi n’icengezamatwara.

Aya mashusho aberekana baceza bari hafi ya Azadi (Ubwisanzure) Tower iri i Tehran mu murwa mukuru.

Abategetsi bari gutanga ibihano biremereye ku bantu bigaragaza mu myigaragambyo yavuye ku rupfu rw’umukobwa wari wafunzwe na polisi y’imyifatire.

Iyi ‘couple’ ntabwo yigeze isanisha guceza kwabo n’imyigaragambyo iri muri Iran.

Hari uwatangarije BBC Monitoring ko aba bombi bahise bafungwa bamaze gutangaza video kuri konti zabo za Instagram, zombi uzishyize hamwe zikurikirwa n’abantu hafi miliyoni ebyiri.

Imyigaragambyo yamagana ubutegetsi yakwiragiye hose mu gihugu nyuma y’uko Mahsa Amini umukobwa w’imyaka 22 apfuye afunzwe na polisi muri Nzeri(9) ishize.

Yari yafatiwe i Tehran ashinjwa kurenga ku itegeko ryo gupfuka umusatsi we na Hijab cyangwa ikindi gitambaro gisanzwe cyo kwambara mw’ijosi.

Astiazh Haqiqi, w’imyaka 21 na fiancé we umusore Amir Mohammad Ahmadi w’imyaka 22, bivugwa ko bahamijwe “gushishikariza ruswa, ubusambanyi, kubangamira umutekano w’igihugu, n’icengezamatwara rirwanya ubutegetsi”.

Umuryango wa Haqiqi, uvuga ko umwuga we ari ugukora imideri (fashion designer), waratewe mbere y’uko uyu mukobwa atabwa muri yombi.

Ntabwo bizwi neza igifungo buri umwe yakatiwe, ariko bombi bakatiwe igiteranyo cy’imyaka 10 n’igice kuri ibyo byaha.

Amakuru avuga ko bahanishijwe kandi kumara imyaka ibiri badakoresha imbuga nkoranyambaga kandi badashobora no kuva mu gihugu.

Imyigaragambyo muri Iran yahereye muri Nzeri ishize ni imwe mu ikomeye cyane yahangaye ubutegetsi kuva uburiho bwajyaho mu mpinduramatwara yo mu 1979.

Mu guyirwanya, leta yatanze ibihano bikomeye ku bayirimo, harimo kwica banyonze bane mu bigaragambya mu ntangiriro z’ukwezi gushize no mu Ukuboza (12).

Mu gihe urupfu rwa Mahsa Amini ari rwo rwasembuye iyi myigaragambyo yaje no kuranwa no kwamagana ubukene, ubushomeri, ubusumbane, akarengane na ruswa.

Abantu babarirwa mu magana barapfuye abandi ibihumbi barafungwa muri iyi myigaragambyo yavuye kuri ruriya rupfu rwa Mahsa.

IZINDI NKURU
Ibitekerezo(0)
Tanga Igitekerezo