Ubuzima

Indwara iterwa na coronavirus yiswe izina

Indwara iterwa na coronavirus yiswe izina

Ishami ry’umuryango w’abibumbye ryita ku buzima (OMS/WHO) rivuga ko izina ry’indwara iterwa n’ubwoko bushya bwa coronavirus ari Covid-19.

Ku munsi w’ejo, Tedros Adhanom Ghebreyesus, umukuru wa OMS, yabwiye abanyamakuru i Genève mu Busuwisi ku cyicaro cy’iryo shami ati: "Ubu noneho dufite izina ry’iyi ndwara rikaba ari Covid-19".

Ihawe iryo zina nyuma yaho umubare w’abamaze guhitanwa na virusi iyitera ubu warenze 1,000. Abantu ibihumib mirongo bamaze kuyandura.

Dr Ghebreyesus yasabye isi kurwanya ishimitse iyo virusi nshya mu buryo bushoboka bwose.

Ijambo coronavirus rishatse kuvuga umuryango w’amavirusi iyo virusi iherereyemo, ntabwo ari ubu bwoko bushya nyirizina.

Iyo virusi ubwayo yahawe ikirango cya SARS-CoV-2 na komite mpuzamahanga ishyira za virusi mu byiciro.

Abashakashatsi bari bamaze igihe basaba ko hajyaho izina ryemewe ry’iyo ndwara mu kwirinda ko habaho urujijo no kunena itsinda ry’abantu cyangwa igihugu.

Bwana Tedros yongeyeho ati: "Byadusabye gushaka izina ritavuga igice runaka cy’isi, inyamaswa, umuntu cyangwa itsinda ry’abantu, kandi rivugitse rinafite aho rihuriye n’iyo ndwara".

"Kugira izina ni ingenzi mu kurinda ko hakoreshwa andi mazina ashobora kuba atari ay’ukuri cyangwa anena. Binaduha ifatizo ryo guheraho mu kwita ubundi bwoko bwa coronavirus bwabaho mu gihe kizaza".

Iri zina rishya ryakuwe ku magambo "corona", virus" na "disease" (indwara), mu gihe 2019 yo igaragaza umwaka yatereye (yatangajwe bwa mbere na OMS ku itariki 31 y’ukwa 12/2019).

Ubu abantu bayirwaye barenga 42,200 mu Bushinwa. Umubare w’abo imaze kwica umaze kurenga uw’abishwe n’icyorezo cya Sars cyo kuva mu mwaka wa 2002 kugera mu wa 2003.

Ku wa mbere, abantu 103 bishwe nayo mu ntara ya Hubei honyine, umubare wa mbere munini ku munsi wari ubayeho muri ako gace, naho abo imaze kwica mu gihugu ubu bageze ku 1,016.

Ariko umubare w’abayandura bashya mu Bushinwa wari wagabanutse kuri uwo wa mbere ho hafi 20% ugereranyije no ku munsi wabanje, uva ku bantu 3,062 ugera ku 2,478.

Mu minsi ya vuba ishize, abategetsi bo mu Bushinwa bakomeje kunengwa kubera ukuntu bari kwitwara ku kibazo cya virusi itera iyo ndwara.

Urupfu rwa muganga wari waburiye ko hateye virusi idasanzwe ariko impuruza ye ikaburizwamo n’abategetsi, rwateje uburakari mu baturage.

BBC

TANGA IGITEKEREZO

Ibitekerezo(0)