Mu gihe isi yose ikomeje kwihuta mu ikoranabuhanga, imbuga nkoranyambaga zabaye nk’ikiribwa cya buri munsi. Waba uri mu kazi, mu ishuri, cyangwa uri mu rugo, telefoni iba iriho — “scrolling”, “likes”, “comments”… ariko se byagenze bite ngo dutangire gutwarwa n’ibyo biryo bitagaragara ?
Abashakashatsi bavuga ko imbuga nkoranyambaga zifite uburyo bwo gushimisha ubwonko nk’uko ibiyobyabwenge bikorwa. Ziduha ibyishimo by’ako kanya, ariko bikatwambura umwanya, ituze, n’ubushobozi bwo gutekereza neza.
Niba nawe wumva ugenda ubatwa n’izo mbuga, dore ibintu 10 byagufasha kubisohokamo buhoro buhoro, ariko mu buryo burambye.
1. Menya impamvu ujya ku mbuga
Ujye wibaza impamvu ituma ujya ku mbuga buri gihe.
Ese ni ukureba amakuru mashya ? Kwerekana ubuzima bwawe ? Cyangwa kwirinda kwumva uri wenyine ?
Kumenya impamvu nyayo bigufasha gutangira kuyigenzura aho kukugenzura.
2. Shyiraho umupaka w’igihe
Niba ujya ku mbuga inshuro nyinshi ku munsi, tangira ushyireho igihe ntarengwa.
Urugero: iminota 30 ku munsi cyangwa igihe runaka mu gitondo no nimugoroba.
Porogaramu nka Digital Wellbeing (Android) cyangwa Screen Time (iPhone) zishobora kugufasha kubikurikiranira hafi.
3. Kuraho apps zidafite umumaro
Reba muri telefoni yawe — hari apps ziba zidafite icyo zikumarira, ariko zikagutwara umwanya.
Zisibe cyangwa uzihishe mu rundi rubuga kugira ngo utazibona buri kanya.
4. Tangirira umunsi kure ya telefoni
Gukanguka ukabanza gufungura Instagram cyangwa WhatsApp ni ikosa rikomeye.
Banza usome, usenge, utegure gahunda zawe, cyangwa unywe amazi.
Tangirira umunsi wawe ku buzima bw’ukuri, aho kuba kuri “feed”.
5. Sabana inshuti z’ukuri, si iz’ikoranabuhanga
Imbuga zigufasha kugira abantu benshi, ariko inshuti nyazo ziba izo mubonana, muganira, musangira, cyangwa mufatanya. Subiza ubuzima bwawe mu biganza by’abantu, si mu mashusho.
6. Fata ikiruhuko ku mbuga nkoranyambaga
Fata icyumweru cyangwa bibiri utazifungura.
Mu ntangiriro uzumva bikugoye, ariko uko iminsi igenda ishira, umutwe wawe uzasubira ku murongo, kandi uzumva uruhutse mu bitekerezo.
7. Simbuza igihe cyawe ibikorwa bifatika
Igihe wamaraga kuri TikTok, ugikoreshe mu gusoma igitabo, gukora siporo, cyangwa kwiga ikintu gishya.
Ubwonko bwawe bukunda “ibishya” — rero ujye uha ibishya bifite umumaro.
8. Funga “notifications”
Ziriya zimenyesha buri kanya (“so-and-so liked your post!”) nizo zituma usubira kuri app buri munota.
Zifunge, urebe uko bituma wumva utekanye kandi wifite.
9. Sobanukirwa uko imbuga zikora
Imbuga nkoranyambaga zubakiye ku “algorithms” zishaka kugukomeza kuri ecran igihe kirekire.
Umenye ko buri “like” cyangwa “video suggestion” ari uburyo bwo kugukomeza mu mugozi wazo.
Iyo ubimenye, biroroshye gufata umwanzuro wo kwigenga.
10. Iga kuryoherwa n’ubuzima butari kuri ecran
Subira gusura ahantu heza, gusangira n’umuryango, cyangwa kuganira n’inshuti udafite telefoni mu ntoki.
Iyo utangiye kumva ibyishimo biturutse mu buzima nyabwo, imbuga zitakubera ikibazo.
Kureka kubatwa n’imbuga nkoranyambaga si ukwigira kure y’ikoranabuhanga, ni ukwisubiza ubuzima mu biganza byawe.
Ubuzima bwawe bw’agaciro ntibupimwa mu “followers” cyangwa “likes”, ahubwo bupimwa mu mahoro, ubwisanzure n’ukuntu wiyumva mu buzima bwa buri munsi.
