Ikigo cya mbere mu Rwanda gitanga amahugurwa mu bijyanye n‘ubwubatsi cyahawe ubuzima gatozi n‘ikigo cy‘Abanyamerika cya mbere ku isi mu gukora porogaramu zifashishwa mu iyigwa ry’imishinga y‘ubwubatsi.
Nkuko bigaragara ku rubuga (website) rw‘ikigo nyarwanda gitanga amahugurwa ahanitse mu gukoresha porogaramu za mudasobwa zifashishwa mu gukora inyigo z‘imishinga ikomeye y’ubwubatsi (CAD and BIM Technologies). Nziza Training Academy, yahawe ubuzima gatozi (Accreditation) n‘ikigo cy‘abanyamerika gikomeye ku isi mu gukora porogaramu zikoreshwa kurusha izindi mu ikorwa ry‘inyigo z‘imishinga y‘amazu, imihanda n‘ibiraro, amazi n‘amashanyarazi, guhanga ibikoresho byo mu nganda, imyidagaduro ndetse n‘ibindi byinshi bitandukanye.
Icyo kigo kuri ubu kikaba cyamaze kwemeza Nziza Training Academy nk‘ikigo cyemerewe gutanga amahugurwa muri porogaramu zikorwa n‘icyo kigo mu Rwanda (Autodesk Authorized Training Center in Rwanda).
Bivuze iki ku Rwanda n‘abari mu mwuga w’ubwubatsi ?
Nk‘uko bisobanurwa n‘umuhanga mu guhanga inyubako architect gregory anthony uyobora ishami ryo guhanga inyubako mukigo Nziza Training Academy, ngo izi ni inzozi ziba zifitwe na buri kigo gitanga amahugurwa.
Ati " Ni inzozi za buri kigo gitanga amahugurwa muri engineering ku isi hose kuba cyakemerwa na autodesk. Ni amahirwe akomeye ku Rwanda ndetse n‘iterambere ry‘ubumenyi ngiro muri iki gihugu."
"Guhabwa ububasha bwo kwigisha porogaramu za autodesk bivuzeko abanyamwuga bari mu Rwanda, bagiye guhabwa ndetse no kwigishwa porogaramu za mudasobwa zikora imishinga ijyanye n‘ubwubatsi byemewe n‘uruganda rwazo rukuru ku isi.
Ubusanzwe mu Rwanda abantu benshi bazikoreshaga bazibye (ibizwi nka cracked software) harimo n‘ibigo bikomeye, ibyo byose bigaterwa nuko kuzibona byabaga bigoye kandi binahenze."
Yunzemo ati " Kubona ikigo gihabwa ububasha bwo kuzitanga no kuzigisha bivuzeko izo mbogamizi zose navuze hejuru zitakiriho, bikongera bikavuga ko ubu noneho abanyarwanda bagiye gutangira gukoresha porogaramu zujuje ubuziranenge zizwi n‘ikicaro gikuru, ibi bizongera umusaruro n‘ubuziranenge bw‘ibikorwa n‘abanyarwanda mu minshinga y‘ubwubatsi ariho hazaturuka ububasha bwo guhangana n‘abanyamahanga ku isoko ry‘umurimo."
Nziza Training Academy ni ikigo rukumbi gitanga amahugurwa agenewe abarangije amasomo ajyanye n‘ubwubatsi muri kaminuza ku gukora inyigo z‘imishinga ikomeye y‘ubwubatsi hifashishijwe porogramu za mudasobwa zijyezweho kwisi (CAD and BIM Technologies) kuva muri 2018.
Ikigo Autodesk kigiye kubanza guhugura abarimu ba Nziza Training Academy ku rwego rwo hejuru babanze babe abarimu bemewe (Autodesk Certified Instructors), nyuma abo barimu bahugure abanyeshuli bitabiriye amahugurwa Nziza Training Academy itanga, ubumenyi buzakomereza mu bigo bifitanye amasezerano y‘ubufatanye mu mahugurwa kugeza ubuhanga bukwiye mu gihugu hose nkuko intego ya Nziza Training Academy ari uguhugura abanyarwanda ku rwego bahangana n‘abandi baturutse mu bindi bihugu.
