Imikino

REG VC irasura Kirehe VC ku munsi wa 4 wa shampiyona

REG VC irasura Kirehe VC ku munsi wa 4 wa shampiyona

Shampiyona y’igihugu y’umukino wa Volleyball y’ikiciro cya mbere mu bagabo irakomeza kuri uyu wa Gatandatu tariki 11 Mutarama 2020, hakinwa imikino ibiri yo ku munsi wa 4.

Muri iyo mikino iteganyijwe kuba, irimo uwa REG VC ifite igikombe cya shampiyona iheruka ya 2018-2019, irahura na Kirehe VC mu mukino ubera mu Karere ka Kirehe guhera saa munani z’amanywa (14h00).

Aganira na Rwanda Magazine, Mugisha Bavuga Benon, umutoza mukuru wa REG VC yatangaje ko bagiye guhura na Kirehe VC bazi neza ko ari ikipe ikomeye bakwiye kwitondera cyane ko izakuba ikinira imbere y’abakunzi bayo.

Avuga ko bagize umwanya uhagije wo kwitegura ikipe ya Kirehe VC. Ati “ Twagize umwanya uhagije wo kwitegura ikipe ya Kirehe VC. Gusa ntabwo ari ibintu byoroshye gusaba abakinnyi kuzamura imikinire mu gihe bari bamaze iminsi mu biruhuko by’iminsi mikuru, ariko nizeye ko baza kubyitwaramo neza.”

Ku rundi ruhande, Kirehe VC itozwa na Bagirishya Jean De Dieu “Jado Castar”, ifite akazi katoroshye ko gushaka insinzi yabo ya mbere dore ko itarabasha gutsinda umukino n’umwe mu mikino 3 imaze gukina.

REG VC yaherukaga kwitwara neza mu mikino 3 yabashije gukina, irimo uwo yatsinzemo IPRC Ngoma VC amaseti 3-0 (25-21, 28-26 na 25-21). Muri uwo mukino wo ku munsi wa 3 wa shampiyona wabereye mu karere ka Ngoma, tariki 30 Ugushyingo 2019.

Ni mu gihe Kirehe VC itabashije kwitwara neza mu mukino uheruka kuko yatsinzwe na UTB VC amaseti 3 kuri 1 (21-25, 25-19, 20-25 na 20-25).

Mu wundi mukino, APR VC iheruka gutungurana itsinda Gisagara VC amaseti 3-1 (19-25, 25-23, 25- 20 na 25-15), irakina na IPRC Ngoma VC ubere kuri Sitade Amahoro i Remera saa kumi n’imwe (17h00).

Kugeza ubu nyuma y’imikino 3, REG VC iyoboye urutonde by’agateganyo n’amanota 8 , ikurikirwa na Gisagara VC, UTB VC na APR VC zinganya amanota 6, IPRC Ngoma VC ni ya 5 n’inota 1 naho Kirehe VC ni ya nyuma (6) nta nota ifite.


Mugisha Bavuga Benon, umutoza mukuru wa REG VC

Bavuga Benon (iburyo) aganira n’umutoza wungirije, Mbonyuwontuma Jean Luc (hagati) ndetse n’umukinnyi Dusabimana Vincent uzwi nka ’Gasongo’

Kirehe VC iheruka gutsindwa na UTB VC mu mukino uheruka ku maseti 3-1

Imikino iteganyijwe kuri uyu munsi wa 4 wa shampiyona ya Volleyball

TANGA IGITEKEREZO

Ibitekerezo(0)