Rayon Sports yanyagiye Heroes FC ikomeza gusatira APR FC (AMAFOTO)

Ibitego bya Sarpong, Yannick , Sidibe na Iranzi byatumye Rayon Sports inyagira Heroes FC 4-1 bituma ikomeza gusatira APR FC.

Heroes FC yazamutse mu cyiciro cya mbere uyu mwaka yari yakiriye Rayon Sports ifite igikombe giheruka. Ni umukino wabereye kuri Stade ya Bugesera kuri iki cyumweru tariki 8 Ukuboza 2019.

Umutoza Javier Martinez yagiriye icyizere abakinnyi babiri babanje mu kibuga umukino wa mbere kuva shampiyona yatangira; Umunyezamu Nsengiyumva Emmanuel Ganza na myugariro Samuel Ndizeye.

Rayon Sports yafunguye amazamu ku munota wa 44 gitsinzwe na Michael Sarpong ku mupira wari uvuye kuri Oumar Sidibe.

Mu gice cya kabiri umutoza Martinez yakoze impinduka Yannick Bizimana afata umwanya wa Gilbert Mugisha naho Ciza Hussein Mugabo asimbura Nizeyimana Mirafa mu gihe Iradukunda Eric Radu wagize akabazo k’imvune yasimbuwe na Saidi Iragire.

Ku munota wa 75, Yannick Bizimana winjiye asimbuye Gilbert yatsinze igitego cya 2 ku burangare bwa ba myugariro.

Ku munota wa 79, Oumar Sidibe yatsinze igitego cya 3 asize ba myugariro ba Heroes FC.Ku munota wa 80, Iranzi Jean Claude yatsinze igitego cya kane cya Rayon Sports, kiba icya kane atsinze muri uyu mwaka w’imikino.

Ku munota wa 85 nibwo Ishimwe Patrick yatsinze igitego cy’impozamarira cya Heroes FC.

Nyuma y’uyu mukino Rayon Sports yahise ishimangira umwanya wa kabiri n’amanota 28, irushwa amanota atatu na APR FC ya mbere. Heroes FC iraguma ku mwanya wa 15 n’amanota umunani.

Police FC yanganyije ibitego 2-2 na Mukura, iri ku mwanya wa gatatu n’amanota 26.

Umukino w’umunsi wa 14 uzahuza Rayon Sports na Mukura VS uzabera kuri stade ya Kigali ku Cyumweru tariki 15 Ukuboza 2019.

Uwageze mu Bugesera wese abanza kujya kumva icyanga cya ’Brochettes’ zo ku Gahembe....abafana ba Rayon Sports bibumbiye muri Gikundiro Forever, aha barabanza kwitaraka mbere yo kuzitapfuna

11 Heroes FC yabanje mu kibuga

11 Rayon Sports yabanje mu kibuga

Nsengiyumva Emmanuel bita Ganza yabanje bwa mbere mu izamu kuva Shampiyona yatangira

Ndizeye Samuel na we yabanje mu kibuga bwa mbere muri Shampiyona

Uko igitego cya mbere cya Rayon Sports cyinjiye mu izamu

Hagati hari Munyakazi Sadate, Perezida wa Rayon Sports FC...I bumoso hari Kanamugire Fidèle, Perezida wa Heroes FC

Yannick na Cyiza Hussein binjiye mu kibuga basimbuye, bahindura umukino

Yannick Bizimana yinjiye asimbuye ahita atsinda igitego

Intsinzi bayishimiye ....Uhereye i bumoso hari Cyiza Richard, umubitsi wa Rayon Sports, Aimable, umujyanama wa komite ya Rayon Sports na Muhire Jean Paul, umunyamabanga wa Rayon Sports

Iradukunda Eric bita Radu yavunikiye muri uyu mukino

Iragire Saidi winjiye asimbuye Radu

Martinez yashimiye Ganza uko yitwaye mu izamu

PHOTO: RENZAHO Christophe