Nyuma ya Mangwende, na Omborenga Fitina agarutse muri APR FC

Ukwezi kumwe nyuma yo kwerekeza ku mugabane w’Uburayi, aho byari byitezwe ko azakinira ikipe ya CSKA Sofia yamwifuzaga, myugariro w’iburyo w’ikipe ya APR FC; Omborenga Fitina aragaruka mu Rwanda.

Omborenga Fitina avuga ko mu bitumye adakinira iyi kipe yo mu murwa mukuru w’igihugu cya Bulgarie ari uko batabashije kumvikana ku byo yabasabaga, aho yahisemo kugaruka mu Rwanda nk’uko yabitangarije urubuga rwa interineti rwa APR FC dukesha iyi nkuru.

Omborenga Yagize ati:” Nibyo koko ngiye kugaruka mu ikipe yanjye APR FC kuko ibyo nasabye ikipe yanyifuzagaya CSKA Sofia, byose tutabashije kubyumvikanaho, nasanze nta mpamvu rero yo kuguma hano, kandi na APR yanjye isanzwe impa ibyo nshaka byose. Rero ngiye kugaruka nkomeze akazi mu ikipe yanjye."

Uyu myugariro w’iburyo, aje akurikira mugenzi we ukina ibumoso, Imanishimwe Emmanuel ’Mangwende’ wagize mu Rwanda mu kwezi gushize hagati, na we ananiranwe n’ikipe yo muri Serbia yari yagiye kugeragerezamo amahirwe.

Si ku nshuro ya mbere Omborenga Fitina yari yerekeje i Burayi, dore ko yakinnyeyo umwaka umwe ari mu ikipe ya MFK Topvar Topolcany yo muri Slovakia mbere yo gutandukana nayo, akaza mu Rwanda, agakinira APR FC.

Omborenga Fitina yari yerekeje i Burayi tariki ya 29 Mutarama uyu mwaka

Mangwende yagarutse mu Rwanda tariki ya 11 z’ukwezi gushize nyuma y’icyumweru yari amaze muri Serbia

Omborenga Fitina ari kumwe na Mugiraneza Jean Baptiste Migi]