Umunyarwandakazi, Mukeshimana Joy Happiness yamaze gusoza amasomo mpuzamahanga y’ubutoza mu mikino y’abafite ubumuga ‘ Para Sports’ yigiraga muri Kaminuza ya Leipzig mu Budage.
Ni amasomo yatangiye tariki 2 Werurwe 2020 asozwa kuri uyu wa Kane tariki 30 Nyakanga 2020. Yitabiriwe n’abanyeshuri 46 baturutse mu bihugu bitandukanye. Mu Rwanda haturutse 2.
Amasomo barangije ni aya ‘sports’ asanzwe atangwa na kaminuza yo mu Budage ya Liepzig university. Iyi kaminuza ifite igice cyo kwigisha abatoza mu mikino inyuranye, ITK (International training course)ifite abanyamuryango mu bihugu birenga 50 ku isi.
Uyu mwaka mu cyiciro cy’impeshyi ( summer semester 2020 ) bari bagabanyije mu matsinda 4 yakurikiranaga amasomo mu ndimi 4 zitandukanye:
1. Handicap sports(English)
2. Football (Spanish)
3.Volleyball (Arabic)
4. Track and field (Francais)
Mukeshimana Joy we yari mu cyiciro cy’imikino y’abafite ubumuga (Handicap sports). Bigishwaga n’abarimu bo mu Budage ariko buri tsinda rikagira abasemura bitewe n’uririmi bigagamo.
Imbogamizi ya mbere ikomeye ngo bahuye nayo ni icyorezo cya Covid-19 cyatumye babanza kwiga bifashishije ikoranabunga rya ‘Zoom’.
Mukeshimana avuga ko ariko ntakundi bari kubigenza, ngo nubwo hari imbogamizi ntibyababujije kuzihanganira ndetse akaba ashimira Imana yabafashije gusoza amasomo yabo.
Iyo umubajije icyo yungutsemo, agusubiza ko ari byinshi ndetse ngo agiye kubishyira mu bikorwa bigire icyo bizamarira abafite ubumuga bakora Siporo zitandukanye zitandukanye.
Ati " Nungutse byinshi cyane mu mikino y’ abafite ubumuga, kuko nubwo nsanzwe ndi umusifuzi muri sitting volley ball ntago ariyo nize gusa ahubwo twize ibijyanye no gutoza imikino irenga 10 muri parasports, harimo wheelchair basketball, goal ball, javelin throw, long jump, gusiganwa ku magare akoreshwa amaboko , football y’ abafite ubumuga, gusiganwa ku bantu bafite ubumuga bwo kutabona ndetse nubw’ ingingo. Ni byinshi nungutse kuko nabashije no kwiga sports sciences muri rusange ndetse na Sports didactics and Sports medicine.”
Iyi kaminuza yagiye inyurwamo n’abanyarwanda banyuranye bahize amasomo ya Siporo Seninga Innocent, Karasira Eric , Hatungimana Christian n’abandi banyuranye.
Mukeshimana Joy Happiness, ni rimwe mu mazina azwi cyane muri siporo ya hano mu Rwanda, haba mu mupira w’amagaru dore ko ari mu bakunzi b’imena b’ikipe ya Rayon Sports FC.
Kumenyakana kwe muri siporo, siho bugarukira gusa, ahubwo asanzwe ari n’umusifuzi mpuzamahanga ku rwego rw’Afurika “Para Volley International Referee” mu mukino wa Volleyball y’abafite ubumuga.
Inkuru bijyanye :
Ibyo wamenya kuri Mukeshimana Joy wateye umugongo ubuganga yize, ajya mu mwuga wo gusifura (VIDEO)
