Imikino

Kagibwami Suayibu na Ingabire batsinze Shampiyona y’Igihugu y’Amagare mu gusiganwa n’igihe

Kagibwami Suayibu na Ingabire batsinze Shampiyona y’Igihugu y’Amagare mu gusiganwa n’igihe

Kagibwami Suayibu udafite ikipe na Ingabire Diane wa Benediction Club ni bo batsinze Shampiyona y’Igihugu y’Amagare ya 2022 mu gusiganwa n’igihe (Individual Time Trial- ITT).

Shampiyona y’Igihugu yari imaze imyaka ibiri idakinwa kubera icyorezo cya COVID-19, yagarutse kuri uyu wa Gatandatu, tariki ya 2 Nyakanga, ikinirwa i Nyamata mu Bugesera aho abakinnyi basiganwaga n’igihe, buri wese agenda wenyine.

Kagibwami Suayibu udafite ikipe nyuma yo gusenyuka kwa SACA, ni we watsinze mu bagabo n’Abatarengeje imyaka 23 nyuma yo gukoresha iminota 43 n’amasegonda 36 ku ntera y’ibilometero 34.

Kuri iyi ntera yakinirwaga mu muhanda wa Nyamata- Rizière- Nyamata, Muhoza Eric na we wakinaga ku giti cye yasizwe amasegonda 16 naho Uhiriwe Byiza Renus wa Nice-Obor aba uwa gatatu asizwe amasegonda 41.

Umukinnyi mukuru waje hafi akurikiye aba batatu bose bari Munsi y’Imyaka 23 ni Munyaneza Didier wa ProTouch wakoresheje iminota 44 n’amasegonda 43, akurikiwe na mugenzi we, Mugisha Samuel, yasize amasegonda 10.

Byukusenge Patrick wa Benediction Ignite yabaye uwa gatatu mu bagabo akoresheje iminota 45 n’amasegonda 40 naho Twizere Frank wa Kigali Cycling Club aba uwa kane akoresheje iminota 51 n’amasegonda 15.

Abagabo bakuru bakinnye kuri uyu wa Gatandatu bari bane naho Abatarengeje imyaka 23 ari 17.

Mu bagore bakoze intera y’ibilometero 26 (Nyamata- Mbyo- Nyamata) hakinnye abakinnyi batatu, Ingabire Diane wa Benediction Club atsinda nyuma yo gukoresha iminota 23 n’amasegonda 46, akurikiwe na mugenzi we, Tuyishime Jacqueline, yasize amasegonda 17 mu gihe Irakoze Neza Violette wakinaga ku giti cye, yasizwe amasegonda 48.

Mu ngimbi zakoze ibilometero bimwe n’abagore, hatsinze Tuyizere Hashimu wa Les Amis Sportifs wakoresheje iminota 19 n’amasegonda 33.

Muri iki cyiciro cyarimo abakinnyi 13, uwa kabiri yabaye Shyaka Olivier wakinaga ku giti cye agasigwa umunota n’amasegonda 45 mu gihe Mushinzimana Jean Bosco wa Les Amis Sportifs, we wasizwe umunota n’amasegonda 56.

Abangavu bo bakoze intera y’ibilometero 22 mu muhanda wa Nyamata- Mayange- Nyamata hatsinda Mwamikazi Djazilla wa Les Amis Sportifs nyuma yo gukoresha iminota 23 n’amasegonda 20.

Uwera Aline wa Bugesera Cycling Team yabaye uwa kabiri akoresheje iminota 23 n’amasegonda 24, akurikiwe na mugenzi we, Tuyishimire Claudine, wasinze umunota umwe n’amasegonda 50.

Shampiyona y’Igihugu y’amagare izakomeza ku Cyumweru, tariki ya 3 Nyakanga, hakinwa isiganwa ryo mu muhanda (Road Race) aho abakinnyi bose bagendera hamwe mu muhanda Shyorongi- Base- Gicumbi- Gasanze.

Ingimbi n’abagore bazahagurukira kuri Base (Kiruri) saa Yine, bafate umuhanda wa Gicumbi - Gasanze ku ndabo, ku ntera y’ibilometero 89,6 mu gihe abagabo bazahagurukira i Kanyinya kuri MAGERWA saa Tatu n’igice, banyure i Gicumbi, basoreze i Gasanze ku ndabo nyuma yo gukora intera y’ibilometero 128,8.


TANGA IGITEKEREZO

Ibitekerezo(0)