Kuri uyu wa Kabiri, ikipe y’igihugu y’u Rwanda, Amavubi yanganyirije na Super Eagles za Nigeria 0-0 kuri Stade Amahoro mu mukino w’umunsi wa kabiri w’amatsinda yo gushaka itike y’igikombe cya Afurika 2025. Ni umukino wanakurikiwe na Perezida Paul Kagame.
Wari umukino wa mbere ikipe y’igihugu Amavubi yakiniye kuri Stade Amahoro kuva ivuguruye aho isigaye yakira ibihumbi 45 ivuye ku bihumbi 25 yakiraga.
Wari umukino w’umunsi wa kabiri wo gushaka itike y’igikombe cy’Afurika cya 2025, ni nyuma y’uko mu mukino w’umunsi wa mbere Amavubi yanganyije na Libya, Nigeria igatsinda Benin 3-0.
Ni umukino kandi warebwe na Nyakubahwa Perezida wa Repubulika y’u Rwanda, Paul Kagame.
Umutoza w’ikipe y’igihugu Amavubi, Frank Spittler yari yahisemo gukora impinduka imwe muri 11 yabanjemo mu mukino uheruka aho Rubanguka Steve yavuyemo hakajyamo Mugisha Bonheur.
Amavubi yari imbere y’abafana ba yo, yatangiye neza aho ku munota wa 1 Mugisha Gilbert yagerageje ishoti ariko rinyura hanze y’izamu.
Amavubi wabonaga ari mu mukino neza, ku munota wa 7 Jojea Kwizera yagerageje kuroba umunyezamu umupira unyura hejuru y’izamu.
Ku munota wa 15, Lookman yafashe umupira yinjirana ubwugarizi bw’Amavubi ariko ataye mu izamu umunyezamu Ntwari Fiacre arawufata.
Ku munota wa 25 , ku makosa ya Mugisha Gilbert watanze umupira nabi mu rubuga rw’amahina, Bashiru yari atsindiye Nigeria ariko baritambika bawushyira muri koruneri itagize icyo itanga.
Muri iyi minota wabonaga Nigeria yamaze kwinjira mu mukino maze abakinnyi b’u Rwanda batangira gukora amakosa aho Bizimana Djihad na Niyomugabo Claude bahawe amakarita y’umuhondo.
Ku munota wa 36, Amavubi yongeye kurokoka ubwo Chukwueze yakubitaga umutambiko w’izamu, Lookman asubijemo biranga.
Ku munota wa 40, Onyemaechi yahinduriwe umupira mwiza n’umutwe ariko ashyizeho umutwe unyura hanze yaryo.
Mu minota 3 ya nyuma y’igice cya mbere Amavubi yabonye amahirwe ariko abarimo Nshuti Innocent ntiyayabyaza umusaruro. Amakipe yagiye kuruhuka ari 0-0.
Nigeria yatangiye igice cya kabiri ikora impinduka 2, Samuel Chukwueze na Victor Boniface bavuyemo hajyamo Simon Moses na Victor Osimhen
Iminota 15 ya mbere y’igice cya kabiri amakipe yombi wabonaga arimo akina ashaka igitego ariko mu buryo bwa kugarira yombi yari ahagaze neza.
Amavubi yakoze impinduka za mbere ku munota wa 60 ubwo Samuel Gueulette yasimburaga Mugisha Gilbert.
Ku munota wa 68, Amavubi yahushije uburyo bukomeye ku mupira Muhire Kevin yahaye Jojea Kwizera ariko yatera mu izamu ukunyura hanze y’izamu.
Ntwari Fiacre yongeye kurokora u Rwanda ku mupira Aina yarenguye maze Lookman atera mu izamu, umunyezamu awushyira muri koruneri itagize icyo itanga.
Amavubi yagerageje gushaka igitego harimo n’ishoti rya Mugisha Bonheur ku munota wa 88 umunyezamu yakuyemo. Ku munota wa 90 Nshuti Innocent yahaye umwanya Gitego Arthur ni nako Jojea Kwizera yahaye umwanya Ruboneka Bosco.
Umukino warangiye ari ubusa ku busa Nigeria ikomeza kuyobora itsinda n’amanota 4, u Rwanda rufite 2 mu gihe Libya ifite 1 iri bukine na Benin ifite ubusa.
Abafana bari bacyereye gushyigikira Amavubi ngo ahatane na Super Eagles za Nigeria
Augustin Bigirimana, umwe mu bashyushyarugamba bo kuri uyu mukino ahagurutsa abafana
Victor Osimhen, kizigenza wa Nigeria, umwe mu bo Nigeria igenderaho yabanje mu basimbura nk’uko byagenze mu mukino uheruka batsinzemo Benin 3-0 agatsindamo kimwe ....ariko i Kigali byamwangiye neza neza
11 Nigeria yabanje mu kibuga
11 Amavubi y’u Rwanda yabanje mu kibuga
Nyuma y’imyaka Umunani Perezida Kagame yongeye gukurikirana umukino w’ikipe y’igihugu y’umupira w’Amaguru inganya Nigeria 0-0 kuri Stade Amahoro.
Yaherukaga kureba umukino w’Amavubi ubwo aya yatsindwaga na Congo Kinshasa 2-1 muri CHAN 2016
Ange Kagame n’umugabo we Ndengeyingoma Bertrand bari mu banyacyubahiro barebye uyu mukino
Perezida Kagame aganira na Minisitiri wa Siporo, Nyirishema Richard
Umukino urangire, Perezida Kagame yasuhuje abafana bamuririmbaga nyuma y’umukino
Liliane, mushiki wa Ange Mutsinzi yashimiye musaza we nyuma y’umukino kuba bimanye u Rwanda
PHOTO:RENZAHO CHRISTOPHE
