David Luiz ukinira ikipe ya Arsenal mu Bwongereza n’ikipe y’igihugu ya Brazil “Seleção “, aragera i Kigali mu Rwanda kuri uyu wa Kane tariki 10 Ukwakira 2019, muri gahunda yo gusura u Rwanda.
Uyu myugariro wakiniye amakipe akomeye atandukandukanye ku mugabane w’u Burayi arimo Chelsea yo mu Bwongereza na PSG yo mu Bufaransa biteganyijwe ko azakora ibikorwa bitandukanye bifite aho bihuriye n’umupira w’amaguru, birimo guhura n’ikipe y’igihugu “Amavubi”, igomba kwitegura mukino wa gicuti na Tanzania.Automatic word wrap
David Luiz azanasura Pariki y’Ibirunga iherereye mu Karere ka Musanze ahaba ingagi anasure n’Urwibutso rwa Jenoside yakorewe Abatutsi rwa Kigali ku Gisozi, ni mbere y’uko azasoza uruzinduko rwe mu Rwanda tariki 13 Ukwakira 2019.
David Luiz wageze muri Arsenal avuye muri Chelsea muri Kanama 2019, amaze gukina imikino 7 ya shampiyona abasha kuyitsindira igitego kimwe gusa.
Mu 2018, u Rwanda binyuze mu Rwego rw’Igihugu rw’Iterambere “RDB” rwagiranye aya masezerano y’imyaka 3 y’ubufatanye n’ikipe ya Arsenal FC yo gukangurira abatuye Isi gusura u Rwanda “Visit Rwanda”.
Ni muri urwo Rwanda Magazine yifuje kubagezaho ibigwi bya David Luiz, utegerejwe gusura u Rwanda
DAVID LUIZ NI MUNTU KI?
Amazina ye yose ni, David Luiz Moreira Marinho yabonye izuba tariki 22 Mata 1987. Avuka muri Diadema, i Sao Paulo mu gihugu cya Brazil. Avuka ku babyeyi, aribo; Ladislau Marinho na Regina Célia Marinho. Avukana na Isabelle Moreira Marinho. Kuri Ubu David Luiz aracyari ingaragu, gusa afite umukobwa bakundana witwa, Sara Madeira.
Mu buzima busanzwe, David Luiz ni umukirisitu. Areshya na metero 1.89 , akaba apima ibiro 86 (86 kg). Ni umukinnyi w’umupira w’amaguru wabigize umwuga ukina mu ikipe ya Arsenal yo muri shampiyona y’ikiciro cya mbere mu Bwongereza.Automatic word wrap
Akunze gukinishwa mu mutima wa ba myugariro (centre back), afite n’ubushobozi bwo gukina mu kibuga hagati afasha ba myugariro (defensive midfielder).
MENYA AMAKIPE YANYUZEMO KUGEZA AHO ARI MURI ARSENAL
David Luis yaje kwerekeza mu ikipe ya Vitória ibarizwa muri Salvador, ni nyuma y’uko yari amaze gutandukana na São Paulo, ndetse atangira gukina nk’umukinnyi wo hagati, ukina afasha ba myugariro gusa yarinze ava muri iyi kipe nta musaruro mwiza atanze akina kuri uwo mwanya. Gusa yaje guhindura umwanya yakinagaho akina mu mutima wa ba myugariro ndetse agenda abyitwaramo neza.
Yakiniye Vitória Umukino wemewe mu mwaka wa 2006, aho yitwaye neza afasha ikipe ye kunganya na Santa Cruz ibitego 2-2, mu irushanwa rya Copa do Brasil. Nyuma y’ibihe bibi iyi kipe yabayemo mu kiciro cya 3, yaje kuzamuka mu kiciro cya kabiri, ni nyuma yo kurangiza iri ku mwanya wa kabiri.
Yatsinze igitego ke cya mbere muri shampiyona ya Brazil tariki 3 Nzeri 2006, ubwo ikipe ye ya Vitória yatsindiraga Clube Atlético do Porto mu rugo ibitego 2-0.
Nyuma y’igihe yari amaze akinira Vitória (1999-2001), tariki 30 Mutarama 2007, David Luiz kwerekeza muri Benfica yo muri Portugal, ku ntizanyo aza nk’umusimbura wa Ricardo Rocha wari werekeje muri Tottenham Hotspur.
Yakinnye umukino we wa mbere bahura na PSG mu mukino wa UEFA Cup wabereye i Parc des Princes, asimbuye Luisao wari wagize ikibazo k’imvune, batsindwa ibitego 2-1, gusa babasha gukomeza mu kiciro gikurikiyeyo ku giteranyo k’ibitego 4-3.
Umukino wa mbere wa shampiyona yawukinnye tariki 12 Werurwe 2007, wahuje Benfica na União de Leiria. Mu mpera z’uwo mwaka w’imikino, David Luiz yaje gusinya amasezerano y’imyaka 5, atanzweho miriyoni 1.5 y’amapawundi.
Mu mwaka w’imikino wa 2009-10, ubwo hari haje umutoza mushya Jorge Jesus, David Luis yabaye umukinnyi mwiza ndetse agirwa na kapiteni wungirije wa Benfica. David Luiz wakinnye imikino 49, atsinda ibitego 3, yaje guhabwa igihembo cy’umukinnyi mwiza wa shampiyona ya Portugal, “Portuguese Liga Player of the Year”, atsinze mugenzi we, Ángel Di María.
Akinira Benfica, David Luiz yatwaranye nayo ibikombe birimo; igikombe cya shampiyona (Primeira Liga) mu 2009-2010. Yatwaye kandi Taça da Liga 3 (2008-2009, 2009-2010 na 2010-2011).
Tariki 31 Mutarama 2011, David Luiz yaje gusinya amasezerano y’imyaka 5 muri Chelsea atanzweho miriyoni 25 z’amapawundi. Yakinnye umukino wa mbere wa shampiyona tariki 6 Gashyantare 2012, asimbuye José Bosingwa mu mukino batsinzwemo na Liverpool igitego 1-0.
Tariki 1 Werurwe 2012, David Luiz yatsinze igitego cya mbere muri Chelsea mu mukino batsinzemo Manchester United i Stamford Bridge ibitego 2-1.
Yabashije gutwarana nayo igikombe cy’amarushanwa ahuza amakipe yabaye aya mbere ku mugabane w’u Burayi azwi nka UEFA Champions League mu mwaka w’imikino wa 2011-2012.
Mu mwaka w’imikino wakurikiyeho wa 2012-2013, Luiz yatwaranye na Chelsea igikombe cy’amarushanwa ahuza amakipe yitwaye neza ku mugabane w’u Burayi azwi nka UEFA Europa League.
Tariki 13 Kamena 2014, Luiz yaje kuva muri Chelsea yerekeza muri PSG yo muri shampiyona y’u Bufaransa aguzwe miriyoni 50 z’amapawundi, bimugira myugariro uguzwe menshi ku Isi. Yaje guhabwa amasezerano y’imyaka 5.
Mu mwaka we wa mbere (2014-2015), Luiz yaje gutwarana na PSG ibikombe 2 birimo; igikombe cya shampiyona (Ligue 1) na Coupe de France. Mu mwaka wa kabiri kandi (2015-2016), Luiz yatwaranye na PSG ibikombe bine bikinirwa mu Bufaransa birimo; igikombe cya shampiyona, Coupe de France, Coupe de la Ligue na Trophée des Champions. Mu 2016, yongeye kandi gutwara igikombe cya Trophée des Champions.
David Luiz yongeye kugaruka muri Chelsea muri Kanama 2016, aguzwe miriyoni 34 z’amapawundi, asinya amasezerano y’imyaka 3. Yakinnye umukino wa mbere batsinzwemo na Liverpool mu rugo ibitego 2-1. Mu mpera z’umwaka w’imikino, David Luiz yagaragaye mu ikipe y’umwaka muri shampiyona y’u Bwongereza.
Luiz yasinye muri Arsenal avuye muri Chelsea, tariki 8 Kanama 2019, bivugwa ko yatanzweho miriyoni 8 z’amapawundi.Tariki 6 Ukwakira 2019, yatsinze igitego cya mbere muri Arsenal cyayihesheje amanota 3, mu mukino wa shampiyona batsinzemo AFC Bournemouth 1-0.
URUGENDO RWA LUIZ MU IKIPE Y’IGIHUGU YA BRAZIL
David Luiz yatangiye akinira ikipe y’igihugu ya Brazil y’abatarengeje imyaka 20 “U20”, mu mikino y’igikombe k’Isi cyo mu 2007 “FIFA U-20 World Cup”, yaje gusezererwa muri 1/8.Automatic word wrap
Nyuma yo kugira umwaka mwiza muri Benfica yahamagawe mu ikipe y’igihugu nkuru yakinnye umukino na USA, bayitsinda ibitego 2-0, wabaye tariki 10 Kanama 2010. Mu mpamvu zatumye ahamagarwa, ni uko ishyirahamwe ry’umupira w’amaguru muri Portugal bari bagaragaje ko bifuza ko yakinira ikipe y’igihugu yabo.
Tariki 7 Nzeri 2012, David Luiz yari kapiteni wa Brazil mu mukino batsinzemo Afurika y’Epfo igitego 1-0, wabereye i São Paulo. Yari mu ikipe ya Brazil yegukanye igikombe mpuzamigabane “2013 FIFA Confederations Cup”, cyabereye iwabo muri Brazil mu 2013.Automatic word wrap
Tariki 2 Kamena 2014, yahamagawe mu ikipe ya Brazil yitabiriye imikino y’igikombe k’Isi cyo mu 2014 “2014 FIFA World Cup”. Kubura kwa Thiago Silva wari wahagaritswe, David Luiz yari kapiteni wa Seleção yasezerewe muri ½ itsinzwe n’u Budage ibitego 7-1.
Yaje no gutsindwa n’u Buholandi mu guhatanira umwanya wa 3, ibitego 3-0. Yari mu ikipe ya Brazil yaje gusezererwa na Chile muri ¼ cy’amarushanwa ahuza ibihugu byo muri Amerika y’Amagepfo azwi nka “Copa América” mu 2015.
Mu 2016, David Luiz ntabwo yahamagawe mu ikipe y’igihugu yitabiriye mu ikipe ya Brazil yitabiriye amarushanwa ya Copa América yabereye muri USA. Kuri ubu David amaze guhamagarwa inshuro 50.
TUMWE MU DUHIGO N’IBIHEMBO YAHAWE KU GITI KE
Mu bihembo David Luiz yatwaye ku giti ke birmo; igihembo cy’umukinnyi miza wa shampiyona ya Portugal “LPFP Primeira Liga Player of the Year” (2009-2010), igihembo cy’umukinnyi mwiza w’ukwezi kwa Gatatu mu 2011 muri shampiyona y’u Bwongereza “Premier League Player of the Month: March 2011”.
Yahawe kandi; igihembo cya FIFA Club World Cup Silver Ball (2012), yari mu ikipe ya “FIFA World Cup Dream Team” (2014), agaragara mu ikipe nziza y’umwaka ya FIFA “FIFA FIFPro World XI” (2014), yari mu ikipe nziza ya 2 y’umwaka ya FIFA “FIFA FIFPro World XI 2nd team” mu 2013, yabaye mu ikipe ya 3 nziza y’umwaka ya FIFA inshuro ebyiri (FIFA FIFPro World XI 3rd team) mu 2015 na 2017.
Yabaye mu ikipe y’umwaka muri shampiyona y’u Bufaransa inshuro 2 (Ligue 1 Team of the Year) mu 2014-2015 na 2015-2016, yari mu ikipe y’umwaka muri shampiyona y’u Bwongereza (PFA Team of the Year) mu 2016-2017 ndetse yari mu ikipe y’umwaka ya UEFA Europa League mu 2018-2019.
David Luiz ukinira Arsenal wayigezemo avuye Chelsea FC ategerejwe gusura u Rwanda
Ubwo David Luiz yakiniraga ikipe ya Chelsea FC
David Luiz na Mama we bishimira igikombe cya UEFA Champions League na UEFA Europa League yatwaranye na Chelsea
Ubwo David Luiz yakiniraga PSG yo mu Bufaransa
David Luiz ari mu ikipe y’igihugu ya Brazil
David Luiz ari kumwe n’ababyeyi be Ladislau Marinho (iburyo) na Regina Célia Marinho
David Luis ar kumwe n’umukobwa bakundana witwa Sara Madeira
Mushiki wa David Luiz, Isabelle Moreira Marinho mu mwambaro w’ikipe y’igihugu ya Brazil
