Mwiseneza Marius Maxime wari usanzwe ari umutoza mukuru w’ikipe ya Espoir BBC yatandukanye nayo yerekeza muri REG BBC, akaba yahawe inshingano zo kuba umutoza wungirije w’iyi kipe.
Uyu usanzwe ari n’umutoza wungirije wa mbere w’ikipe y’igihugu ya Basketball nkuru mu bagabo, yasinye amasezerano yo kuba umutoza wungirije wa REG BBC mu gihe k’imyaka ibiri.
Mu kiganiro yagiranye na Rwanda Magazine, Mwiseneza Maxime yatangaje mu masezerano yagiranye n’ubuyobozi bw’ikipe ya REG BBC yasabwe kubafasha gutwara ibikombe no kuzamura urwego rw’abakinnyi bafite bakiri bato.
Ati “Nasabwe na REG BBC kubafasha gutwara ibikombe no kuzamura urwego rw’ abana bafite.”
Uyu mutoza ugaragaza ko adafite umwanya wo kuba umutoza mukuru, atangaza ko yifuza gukurikirana abakinnyi bakiri bato kugira ngo bazabashe gutanga umusaruro mu ikipe y’igihugu mu marushanwa atandukanye arimo Afro Basket ya 2021.
Ati “Ariko nta n’umwanya nkibona wo kuba umutoza mukuru, ndashaka gukurikirana bariya bana b’ikipe y’igihugu bari yo (REG BBC), tugomba gutegura neza 2021, nubwo naba ntakiri mu ikipe y’igihugu.”
Mwiseneza akaba asimbuye Ngwijuruvugo Richard Patrick wari usanzwe ari umutoza wungirije, wamaze gusoza amasezerano yari afitanye na REG BBC yarangiye tariki 02 Ukwakira 2019.
Mwiseneza wagizwe umutoza wungirije wa REG BBC agomba gutegereza ko hashyirwaho umutoza mukuru bazafatanya, usimbura Igor Kovacevic ukomoka muri Serbie, watandukanye n’iyi kipe mu gihe gito yari ayimazemo nyuma yo kunanirwa kuyihesha igikombe cya shampiyona ya 2018-2019.
Mwiseneza Maxime asize afashije Espoir BBC gusoreza ku mwanya wa 4 muri shampiyona ya 2018-2019, inyuma ya APR BBC yabaye iya 3, REG BBC yabaye iya kabiri ndetse na Patriots BBC yabaye iya mbere.
BIMWE WAMENYA KURI MWISENEZA MAXIME
Yabaye umutoza wungirije wa Espoir BBC kuva muri Mata 2012 kugeza mu Kwakira 2016. Yari mu ikipe ya Espoir BBC yitabiriye imikino ya “Afro Basket Club Championship”, yabereye i Malabo muri Equatorial Guinea mu 2012.
Yatwaranye na Espoir BBC igikombe k’imikino y’Akerere ka 5 “Zone V Club Championship” yabereye i Kampala muri Uganda mu 2012. Yari muri Espoir BBC yegukanye umwanya wa 3 mu mikino y’Akerere ka 5 “Zone V Club Championship” yabereye i Bujumbura mu Burundi mu 2013.
Yari muri Espoir BBC yegukanye kandi umwanya wa 3 mu mikino y’Akerere ka 5 “Zone V Club Championship” yabereye i Kigali mu Rwanda mu 2015. Yagaragaye muri Espoir BBC yitabiriye imikino y’Akerere ka 5 “Zone V Club Championship” yabereye i Mombasa muri Kenya mu 2014.
Yatwaranye na Espoir BBC igikombe cya shampiyona inshuro 4 yikurikiranya (2012, 2013, 2014 na 2015). Yatwaranye na Espoir BBC igikombe cya Playoffs inshuro 4 yikurikiranya (2012, 2013, 2014 na 2015).
Yatwaye igikombe cyo kwibuka “GMT”, ku makipe y’imbere mu gihugu inshuro 3 (2012, 2013 na 2014) ndetse n’ibikombe 4 biri mpuzamahanga (2012-2013-2014 na 2015).
Yatwaye ibikombe by’irushanwa ryo kwibuka “Heroes Tournament” inshuro 4 (2012, 2013, 2014 na 2015) ndetse n’ibikombe 4 by’irushanwa ribanziriza shampiyona “Preseason Tournament” (2012, 2013, 2014 na 2015).
Yagizwe umutoza mukuru wa Espoir BBC mu Kwakira 2016. Yayifashije gusoreza ku mwanya wa 2 wa shampiyona. Mu mwaka wa 2016-2017, yafashije Espoir BBC gusoreza ku mwanya wa kabiri mu irushanwa rya “Playoffs”. Mu mwaka wa 2016-2017, yatwaranye na Espoir BBC igikombe k’irushanwa rya “Genocide Memorial Tournament”.
MU IKIPE Y’IGIHUGU
Mwiseneza wakinnye Basketball mu kiciro cya mbere (2002-2010), yagizwe umutoza wungirije w’ikipe y’igihugu kuva mu Kuboza 2017 kugeza muri Gashyantare 2018. Yagizwe umutoza mukuru w’agateganyo muri Mata 2018.
Yayoboye ikipe y’igihugu yitabiriye imikino yo gushaka itike y’igikombe k’Isi “World cup Qualifications 2019”, yabereye i Bamako muri Mali muri Gashyantare 2018.
Yungirijwe na Nkusi Aime Karim batoje imikino itatu batsindamo ibiri, maze ikipe y’igihugu ibona itike yo gukina ijonjora rya kabiri mu gushaka itike y’igikombe k’Isi “2nd round of FIBA World Cup Qualifiers FIBA Basketball World Cup 2019 Qualifiers”, yaje kubera muri Nigeria.
Yongeye kuba umutoza wungirije wa mbere w’ikipe y’igihugu, kuva muri Kamena 2018 kugeza ubu (2019).
Ubwo Mwiseneza yatangaga amabwiriza ku bakinnye ba Espoir BBC
Mwiseneza atanga amabwiriza kuri Sangwe Armel
Mwiseneza aganira na Kazeneza Emile Galois wari kapiteni wa Espoir BBC
Mwiseneza Maxime wari umutoza mukuru w’agateganyo w’ikipe y’igihugu atanga yereka abakinnyi uko bagomba gukina
Mwiseneza Maxime (ibumoso) aganira n’umutoza mukuru w’ikipe y’igihugu, Vladmir Bosnjak
