Abakinnyi 10 ba APR FC muri 27 bagomba kwitegura Côte d’Ivoire

Mu kiganiro n’abanyamakuru cyabereye ku cyicaro cy’Ishyirahamwe ry’umupira w’Amaguru mu Rwanda, FERWAFA, kuri uyu wa Mbere tariki ya 11 Werurwe 2019, umutoza w’ikipe y’igihugu Amavubi Mashami Vincent yatangaje abakinnyi 27 bagomba kwitegura umukino wa Cote d’Ivoire uzaba mu byumweru bibiri biri imbere.

Amavubi azasoza urugendo rwo gushaka itike yo kujya muri CAN 2019 izabera mu Misiri muri Kamena, yakirwa na Cote d’Ivoire tariki ya 23 Werurwe 2019 kuri Stade Bouaké i Abidjan. Ikipe y’igihugu y’u Rwanda yamaze gusezererwa kuko iri ku mwanya wa nyuma mu itsinda H ririmo Cote d’Ivoire, Guinea na Centrafrique.

APR FC niyo ifite abakinnyi benshi bahamagawe (10), Rayon Sports ifitemo abakinnyi batanu, Mukura Victory Sport abakinnyi batatu, AS Kigali umukinnyi umwe, Kiyovu Sport umukinnyi umwe n’abandi bakinnyi barindwi bakina hanze.

Mu bakinnyi bahamagawe, hajemo umunyezamu Mvuyekure Emery wari umaze igihe adahamagarwa. Uyu musore kuri ubu ukinira ikipe ya Tusker FC muri Kenya, ni umwe mu bari kwitwara neza muri iyi minsi nyuma yo kuva mu Rwanda.

Rwatubyaye Abdul wamaze kwerekeza muri Kansas FC yo muri MLS muri Amerika yahamagawe kimwe na Muhire Kevin kuri ubu uri kubarizwa muri Dakhleya yo mu Misiri. Nsabimana Eric wa AS Kigali na we yongeye kubona umwanya mu ikipe y’igihugu nyuma y’igihe kitari gito kimwe na Habimana Hussein wa Rayon Sports.

Umunyezamu wa Rayon Sports Mazimpaka Andre watsinzwe igitego kimwe mu mikino irindwi iheruka ntiyahamagawe, aho Mashami yavuze ko babibonye ko ameze neza, ariko na we ntawakwirengagiza ko yamaze igihe kirekire adakina.

Amavubi azatAngira umwiherero kuwa Kane, akorera kuri Stade Amahoro, azahaguruke mu Rwanda tariki ya 21 z’uku kwezi.

Guinea yamaze kubona itike, iyoboye itsinda H n’amanota 11, ikurikiwe na Cote d’Ivoire ifite amanota 8. Centrafrique bafite amanota atanu ku mwanya wa gatatu mu gihe u Rwnada ari u rwa nyuma n’amanota abiri gusa.

Abakinnyi 27 bahamagawe

Abanyezamu

1. Rwabugiri Omar (Mukura VS)
2. Kimenyi Yves (APR FC)
3. Mvuyekure Emery (Tusker FC, Kenya)

Ba myugariro

1. Rwatubyaye Abdul (Kansas FC, USA)
2. Nirisarike Salomon (FC Tubize, Belgium)
3. Manzi Thierry (Rayon Sports)
4. Buregeya Prince (APR FC)
5. Fitina Omborenga (APR FC)
6. Imanishimwe Emmanuel (APR FC)
7. Habimana Hussein (Rayon Sports)
8. Iragire Saidi(Mukura VS)
9. Rutanga Eric (Rayon Sports)
10. Iradukunda Eric (Rayon Sports)

Abakina hagati

1. Butera Andrew (APR FC)
2. Niyonzima Ally (APR FC)
3. Muhire Kevin (Da
4. Niyonzima Olivier (Rayon Sports)
5. Nsabimana Eric (AS Kigali)
6. Bizimana Djihad (Waasland Beveren, Belgium)
7. Nshimiyimana Imran (APR FC)

Ba rutahizamu

1. Kagere Meddie (Simba SC, Tanzania)
2. Tuyisenge Jacques (Gor Mahia, Kenya)
3. Hakizimana Muhadjiri (APR FC)
4. Nshuti Dominique Savio (APR FC)
5. Nizeyimana Djuma (Kiyovu Sport)
6. Iradukunda Bertrand (Mukura VS)
7. Byiringiro Lague (APR FC)

Bonnie Mugabe ushinzwe amarushanwa n’itangazamakuru muri FERWAFA

umutoza w’ikipe y’igihugu Mashami Vincent yahamagaye abakinnyi 27 bitegura Cote d’Ivoire

Mashami n’umutoza wungirije Seninga Innocent

Umutoza w’abazamu b’Amavubi Higiro Thomas

JImmy Mulisa na we wungirije mu Amavubi