Abanyamuryango bamwe mu bari bagize March Generation Fan club bamaze gushinga Fan club nshya ndetse banashyiraho ubuyobozi bwayo.
Kuri iki Cyumweru tariki 12 Nyakanga 2020 nibwo hatangajwe ubuyobozi bwa Fan Club nshya yitwa Dream Unity yahozemo abari abanyamuryango ba March Generation. Dream Unity yashinzwe tariki 10 Nyakanga 2020 ndetse yanamaze kwakirwa muri Fan Clubs za Rayon Sports.
Dr. Karera Claudine niwe wagizwe umuyobozi wa Dream Unity. Yungirijwe na Nziza Yvany Kayumba. Uwimana Jeanine niwe wabaye umunyamabanga naho Nshimiyumukiza Sam agirwa umubitsi wa Dream Unity.
Komite ya Dream Unity
1. President: Dr. KARERA Claudine
2. Vice President: NZIZA Yvan Kayumba
3) SG: UWIMANA Jeannine
4) Umubitsi: NSHIMYUMUKIZA Sam
Abajyanama (Agateganyo)
1) Padiri NDAGIJIMANA Alphonse,
2) Padiri HABIMANA Jean Damascene
3) NDUWAWE Patience
Abayobozi ba Unit
1) MUPENZI MUDATINYA Eugene
2) SERINDWI Laurent (Lolo)
Commisions
1) Annimation: NSHIMYUMUREMYI Frank
2) Social: NGIRUWONSANGA Daniel
’Ntitwari tugihuza’
Mu kiganiro yagiranye na Rwandamagazine.com, Uwimana Jeanine watorewe kuba umunyamabanga wa Dream Unity (ndetse akaba yari amaze imyaka 5 ari umunyabanga wa March Generation) yavuze ko impamvu yatumye biyemeza kuva muri March Generation ngo ari uko batari bagihuza na Perezida wayo, Runigababisha Mike ndetse ngo baka basangaga icyabahuje (ikipe ya Rayon Sports), batari bagihuza uburyo bwo kuyishyigikira.
Ati " Ubundi icyo dukorera twese ni Rayon Sports, si umuntu. Ikipe niyo yaduhuje. Ubu byari bigeze aho dusanga icyaduhuje ataricyo tugisihyikiye ahubwo umuntu umwe cyangwa abantu babiri bashaka ko tugendera ku myumvire yabo yo kudashyigikira ubuyobozi. Niba batemera ubuyobozi, urumva ko byari bisigaye bigorana gushyigikira ikipe kandi ariyo dukorera."
’Igitugu’
Jeanine avuga ko nubusanzwe ngo ahari abantu barenze babiri hatabura ibibazo ariko ngo imyaka yose yari ishize barabikemuraga bigakunda ariko ngo bigeze kucyo kuba bashyigikira ikipe muri iki gihe, bizamo icyo yise igitugu.
Ati " Uwavugaga neza ubuyobozi cyangwa agasaba ko bwashyigikirwa, yakurwaga ku rubuga...uwasobanuzaga wese yakurwaga ku rubuga ku buryo byageze ubwo we (Mike) na Visi Perezida bafunga urubuga, baba aribo basigara bonyine bemerewe kwandikaho. Byakozwe bamaze kubona ko abantu barambiwe ko Fan club yabo ariyo igaragara ku ruhembe rwo kurwanya ubuyobozi kandi yari isanzwe iza imbere mu kubushyigikira ."
"Icyo ni igitugu kuko kutagira ibyo wumva kimwe n’umuntu, ntibibyababuza kubana. Abo mubana uba ugomba kumva ibitekerezo byabo mugahuza. Na mbere ibibazo byabagaho ariko byahinduye isura, tubona ko ibyiza twashinga indi fan club, tukabona uko dukomeza gushyigikira ikipe kuko niyo iduhuza kandi izahoraho."
Jeanine avuga ko koko mu gihe hari kuramuka hatarimo ikibazo gikomeye, abagera kuri 80 batari kwiyemeza kuva muri March Generation nta kibazo gikomeye kibayemo.
’Barabeshya’
Mike Runigababisha washinze March Generation yatangarije Rwandamagazine.com ko abashinze Dream Unity babeshya ahubwo ngo kwiyomora kuri March Generation buririye kuri ’Declaration’ yakoze ku maradiyo yo kuvuga ngo Sadate yegure.
Ati " Ibyo bavuga barabeshya ahubwo bafite bo ukuntu babipanze. Twe ntabwo navuga ko tutari dushyigikiye ubuyobozi kuko gahunda zose twazikoraga ndetse na gahunda y’Ubururu bwacu twiyemeje ko izatakobwa muri uku kwezi kwa Nyakanga ikarangira muri Kanama."
Yunzemo ati " Ahubwo bo buririye kuri iriya ’declaration’ nakoze yo kuvuga ngo Sadate yegure. Ntamuntu tutumvikanaga. Ni umwuka mubi wa bamwe bumva ko nanenze ubuyobozi, aba aribyo bitwaza ariko ntabwo aribyo rwose. Erega ntabwo nenga ubuyobozi kubera ko nanga Sadate, nenga ubuyobozi kubera impamvu."
" Impamvu bo barayizi, naho ibyo bavuga ko ari ukudashyigikira ubuyobozi sibyo. Biriya ni nko guhima Mike ....naho abaduhannye (yahagaritswe umwaka) bo ntabushobozi bafite. Ariko kuba bahisemo kuba fan club ukwabo ntacyo bitwaye, twe ubu tugiye kwihutisha gahunda yo gutanga Ubururu bwacu. "
Dream Unity yashyizeho umurongo mushya ngo uzatuma ibyababayeho muri March Generation bidasubira
Jeanine yabwiye Rwandamagazine.com ko nabo bari barinjiye muri March Generation bayikunze ndetse ngo kuyivamo ni ikintu cyabagoye.
Yavuze ko bihaye umurongo uzatuma ngo batazongera guhura n’ibyabayeho muri Fan club bahozemo ya March Generation.
Ati " Nkanjye nari nyimazemo imyaka 5 kandi icyo gihe cyose nari umunyamabanga wayo. Ni fan club nakundaga, nitangiye cyane ndetse no kuyivamo byari ibintu bigoye ariko iyo ubona ibyo mwiyemeje bitagikunze, ushaka uko watangira ibishya ahubwo ukiha intego nshya."
Itangazo Dream Unity yashyize hanze ishingwa ari naryo ngo rikubiyemo umurongo wabo rigira riti :
IJAMBO ry’Ibanze mu shingwa rya DREAM UNITY FAN CLUB
BASANGIRANGENDO,
Tariki ya 10/07/2020, abagabo n’abagore biyemeje gushinga fan club nshya, ariyo DREAM UNITY FAN CLUB, itsinda ry’abafana ba Rayon Sports.
Nka DREAM UNITY FAN CLUB,
# Twanze kuba uburo bwinshi butagira umumaro, twerekeje imbaraga n’ibitekerezo byacu mu bikorwa biteza imbere Rayon Sports.
# Twanze ihangana iryo ariryo ryose n’uwariwe wese, n’icyaricyo cyose, kuko bipfusha ubusa umwanya n’imbaraga zacu mu kubaka Gikundiro yacu.
# Twiyemeje gukurikira umurongo umwe w’ibitekerezo binyuranye bifite intumbero imwe iganisha ku terambere rya Rayon Sports.
Umurongo udukwiye:
# Buri munyamuryango asabwa kubahiriza Amahame Shingiro ya DREAM UNITY FAN CLUB.
# Buri munyamuryango wa Dream Unity Fan Club ni inkingi ya mwamba, ijambo rya buri wese rigira agaciro.
# Umuyobozi ni umukozi w’abo ayobora.
# Kumva ibintu mu buryo butandukanye n’uko umuyobozi abyumva si icyaha.
# Ihame ry’impaka zubaka zitari iza ngo turwane ku ngingo zifite uburemere bihabwa umwanya.
# Aho gushyira imbere gutandukanya abantu, kunga abatumva ibintu kimwe ni intego yacu.
# Dream Unity ni Fan Club idashingiye ku gushyigikira umuntu uwo ariwe wese, ahubwo ikiri imbere y’ibindi byose ni Rayon Sport!
Kugeza ubu Dream Unity irimo abanyamuryango bagera kuri 80 ndetse banamaze gutanga umusanzu wabo muri ’Ubururu bwacu’.
‘Ubururu bwacu’ ni gahunda nshya ikorwa buri mwaka na Fan Clubs za Rayon Sports. Buri fan Club igira amafaranga itanga agahurizwa hamwe, akagurwa umukinnyi umwe mushya iyo isoko ry’igura rifunguwe.
Kugeza ubu izi Fan Clubs za Rayon Sport zemewe zimaze kwiyemeza gutanga
Miliyoni umunani (8.867.600 FRW). Amaze gutangwa ni Miliyoni esheshatu (6.032.600 FRW) harimo 300.000 FRW byamaze gutangwa na Dream Unity mu rwego rwo gushyigikira Rayon Sports mu kugura abakinnyi.
Dr. KARERA Claudine wari usanzwe ari umujyanama muri March Generation niwe watorewe kuba Perezida wa Dream Unity Fan club
NZIZA Yvan Kayumba , Visi Perezida wa Dream Unity Fan club
Uwimana Jeanine wari usanzwe ari umunyamabanga wa March Generation mu myaka 5 ishize, yatorewe kuba umunyamabanga wa Dream Unity Fan club
Nshimyumukiza Sam, umubitsi wa Dream Unity Fan club
NSHIMYUMUREMYI Frank wari ushinzwe ’animation’ muri March Generation, niwe watorewe uyu mwanya muri Dream Unity
