Abagore babiri, basanzwe ari abarwanashyaka ba MDC, ishyaka ritavuga rumwe b’Ubutegetsi bwa Zimbabwe hanwe n’umudepite batawe muri yombi bashinjwa gukoresha imvugo itukana kandi iteye isoni babigiriye abapolisi.
Igipolisi kivuga ko aba bagore batatu bafashwe ejobundi ku wa mbere, tariki ya 01 Gashyantare nyuma y’imyigaragambyo yabereye ku nyubakwa ya Leta ku Murwa mukuru Harare.
Itangazo ryasohowe n’igipoIisi rivuga ibi riti: "Igiporisi cya Zimbabwe kiremeza ifungwa rya Joanna Mamombe [umudepite], Netsai Marova na Cecilia Chimbiri i Harare nyuma y’imyigaragambyo hanze y’inyubakwa nshya ya Leta".
"Aba bagore batatu bari mu modoka yo mu bwoko bwa Toyota itari ifite inomero iyiraga [purake] bagiye bakurikira imodoka y’igipolisi yarimo abaporisi bari bagiye gukurikirana iyo myigaragambyo, bagenda babatuka, [ari na yo mpamvu] yatumye bafungwa".
Muri Kamena umwaka ushize, aba bagore, bose basanzwe bari abarwanashyaka ba Movement for Democratic Change (MDC), bari batawe muri yombi nyuma yo kubeshya ko bakorewe iyicwarubozo muri kasho.
Bavuze ko ingabo z’igihugu zabashimuhe zibakuye zibambuye igipolisi, zirabakubita ndetse zinabafata ku ngufu, maze zibategeka umwe umwe kunywa inkari za mugenzi we.
Igipolisi cyahakanye ibi birego, ariko impuguke z’Umuryango w’Abimbumbye (ONU) basabye ko ubucamanza bwakurikirana "abakoze iki cyaha cy’agahomamunwa".
MDC yanditse ku rubuga rwa Twitter ko iri fungwa ryerekana ko leta yakajije umurego "mu ntambara yo kurwanya abatavuga rumwe n’ubutegetsi".
Hagati aho, Leta y’Ubwongereza itangaza ko yafatiye ibihano abategetsi bane b’urwego rw’umutekano ba Zimbabwe, ikabashinja guhonyora uburenganzira bwa muntu, harimo kwica abari mu myigaragambye.
Minisitiri w’Umutekano, Owen Ncube, hamwe n’abayoboye igipolisi, urwego rw’iperereza ndetse n’uwahoze ari umukuru w’ingabo zishinzwe gucunga umutekano w’umukuru w’igihugu, bagiye gufatirirwa imitungo yabo ari mu Bwongereza.
Ntibemerewe kandi no kwinjira muri icyo gihugu.
Ubwongereza bushinja aba bantu kurasa ku bari mu myigaragambyo yabaye nyuma y’amatora yo mu 2018, hamwe n’imigumuko yadutse mu mwaka wakurikiye.
Mu butumwa yacishije ku rubuga rwa Twitter, umuvugizi wa leta ya Zimbabwe, Nick Mangwana, yavuze ko nta n’umwe muri aba bategetsi bafatiwe ibihano imitungo mu Bwongereza cyangwa yari afite umugambi wo gufata urugendo ngo ajye muri iki gihugu.
