Nyiri Twitter Elon Musk yahishuye ko iyi kompanyi yahombye hafi kimwe cya kabiri cy’amafaranga yinjizaga mu kwamamaza kuva yayigura kuri miliyari 44 z’amadolari y’Amerika mu kwezi kw’Ukwakira (10) mu 2022.
Yavuze ko iyi kompanyi itagize kwiyongera kw’inyungu yari yiteze mu kwezi gushize kwa Kamena (6), ariko yongeraho ko uku kwezi kwa Nyakanga (7) "gutanga icyizere gacye kurushaho".
Nyuma yo kugura Twitter, Musk yirukanye hafi kimwe cya kabiri cy’abakozi 7,500 Twitter yari ifite, mu muhate wo kugabanya amafaranga ikoresha.
Amagereranya amwe avuga ko Threads, ’app’ mucyeba wa Twitter, ubu ifite abayikoresha bagera kuri miliyoni 150.
Kuba Threads ishingiye kuri Instagram, bihita biha urwo rubuga, na rwo rwa kompanyi Meta, kuba rushobora kugera ku bakoresha Instagram babarirwa muri miliyari ebyiri.
Hagati aho, Twitter, mucyeba wa Meta, irimo kugorwa n’imyenda (amadeni) myinshi. Mu mpera y’icyumweru gishize, Musk yavuze ko amafaranga Twitter yinjiza ataragera ku kigero yifuza, nubwo uyu muherwe utunze za miliyari atavuze igihe igabanuka ry’inyungu yo mu kwamamaza ku kigero cya 50% ryabereye.
Mu butumwa bwo kuri Twitter yagize ati: "Ducyeneye kugera ku mafaranga y’inyungu twifuza mbere yuko tugera ku cyo twifuza kindi".
Nyuma yo kwirukana abakozi babarirwa mu bihumbi ndetse ikaba yaragabanyijeho ikishyura ku mafaranga irimo (ifitiye) Google muri serivisi yayo ya Cloud, Musk yavuze ko Twitter ishobora kugera ku nyungu ya miliyari 3 z’amadolari y’Amerika muri uyu mwaka wa 2023, macyeya ugereranyije na miliyari 5.1 z’amadolari y’Amerika yungutse mu 2021.
Ibi ni cyo kimenyetso cya vuba aha cyane cyuko ingamba zo kugabanya cyane amafaranga Twitter yakoreshaga bitahagije mu gutuma abamamaza bagaruka, nyuma yuko bahunze impinduka mu mategeko ajyanye no gukorera ubugororangingo ibitangazwa kuri urwo rubuga.
Ibyo byabaye nubwo mu kiganiro na BBC mu kwezi kwa Mata (4) uyu mwaka, uwahoze ari umuyobozi nshingwabikorwa muri Twitter yumvikanishije ko benshi mu bamamaza bagarutse kuri uru rubuga.
Muri uku kwezi, Twitter yafashe icyemezo cyo kugabanya umubare w’ubutumwa (tweets) abayikoresha bashobora kureba.
Abayikoresha badafite akamenyetso ko konti zabo ari nta makemwa (unverified users) bashobora gusoma ubutumwa 1,000, naho abagafite bashobora gusoma ubutumwa 10,000 buri munsi, icyemezo BBC yavuze ko cyatangaje cyane abakuriye ibikorwa byo kwamamaza muri za kompanyi zimwe.
Ibi bibaye nyuma y’umuhate wa Twitter wo gutuma abayikoresha bayoboka serivisi yayo y’ifatabuguzi ryishyurwa yitwa Twitter Blue.
Linda Yaccarino, mbere wari umukuru wo kwamamaza muri kompanyi NBCUniversal, mu kwezi gushize kwa Kamena (6) yagizwe umuyobozi nshingwabikorwa wa Twitter – icyemezo gica amarenga ko ubucuruzi bwo kwamamaza bukiri ikintu cyihutirwa kuri Twitter.
Yaccarino yavuze ko gahunda ya Twitter ari ukwibanda kuri videwo n’ubufatanye mu bucuruzi. Bivugwa ko Twitter iri mu biganiro by’ibanze n’abakomeye muri politiki no mu myidagaduro, serivisi zo kwishyura ndetse n’ibitangazamakuru.
BBC
