Uko uwari boss wa Nissan yacitse Ubuyapani atwawe mu gikarito

Umugabo w’Umunyamerika n’umuhungu we bohererejwe Ubuyapani aho baregwa gufasha Carlos Ghosn wahoze akuriye uruganda rwa Nissan gucika icyo gihugu.

Umwaka ushize nibwo aba bombi barezwe gufasha Bwana Ghosn gutoroka Ubuyapani yahishwe mu gikarito cyajyanywe mu ndege bwite nk’umuzigo.

Ghosn yahungiye mu gihugu yarerewemo, Liban, kidafitanye n’Ubuyapani amasezerano yo guhana abakekwaho ibyaha.

Michael Taylor n’umuhungu we Peter Taylor bamaze amezi barwana inkundura mu mategeko ngo batoherezwa mu Buyapani.

Mu kwezi gushize, urukiko rw’ikirenga rwa Amerika rwategetse ko Taylor n’umuhungu we boherezwa, bombi bari bafunze kuva mu kwezi kwa gatanu.

Ku wa mbere w’iki cyumweru ni bwo bahawe abategetsi b’Ubuyapani, nk’uko bivugwa n’abanyamategeko babo.

Bashinjwa ko bishyuwe miliyoni $1.3 kugira ngo bafashe Carlos Ghosn gucika Ubuyapani mu kwezi kwa 12/2019.

Michael Taylor w’imyaka 60 yahoze mu mutwe udasanzwe w’ingabo z’Amerika, yari afite ikigo cyitwa American International Security Corporation, gikora ibyo gufasha abantu kuva mu bibazo bikomeye ahatandukanye ku isi.

Ikinyamakuru Vanity Fair kivuga ko Taylor yabashije gukora ’operations’ zirenga 20 zo gucikisha abantu, akishyuza abakiliya be hagati ya $20,000 na miliyoni $2 kuri buri kazi.

Ghosn yacitse avuye i Tokyo agera i Beirut mu buryo bwateguwe mu byumweru cyangwa amezi menshi, nk’uko ibinyamakuru bitandukanye byabitangaje.

Ikinyamakuru NHK cy’Ubuyapani kivuga ko amashusho ya CCTV yerekanye Carlos Ghosn ava mu nzu ye akagenda n’amaguru agana kuri hotel iri hafi, aho yahuriye n’abandi bagabo babiri.

Uko ari batatu bafashe gari ya moshi igana i Osaka, bajya muri hoteli iri hafi y’ikibuga cy’indege mpuzamahanga cya Kansai.

Bikekwa ko Ghosn yafunzwe neza mu gikarito kinini cy’umukara nk’umwe mu mizigo ibiri, maze gitwarwa mu ndege bwite kitagenzuwe n’abashinzwe umutekano.

Mu kwezi gushize, urukiko rwo muri Turkiya rwahamije kompanyi y’indege ya MNG n’abapilote babiri uruhare rwabo mu kuvana Ghosn mu Buyapani.

Ubuyapani bwashyizeho impapuro zo guta muri yombi Carole, umugore wa Carlos Ghosn

’Urupfu cyangwa guhunga’

Uyu mugabo wahoze akuriye Nissan yabanje gufatwa mu kwezi kwa 11/2018 aregwa gutanga amakuru atari yo ku mushahara we mu myaka itanu kugeza mu 2015.

Hakurikiyeho ibindi birego, birimo icya Nissan yamureze kohereza amafaranga y’iyi kompanyi mu bikorwa bye bwite.

Uyu mugabo utunze za miliyoni yamaze amezi muri gereza nyuma afungirwa mu rugo, aho yakurikiranwaga amasaha 24 ku munsi kandi akabona akanya gato ko gukoresha internet.

Nyuma yo gucika, Ghosn yakoze ikiganiro n’abanyamakuru muri Liban, aho yahakanye ibyaha aregwa mu Buyapani, avuga ko inzego z’ubucamanza zaho "zibogamye".

Yavuze ko mu Buyapani yari "umuntu washimuswe" ufite amahitamo hagati yo gupfa no guhunga.

Avuga ko yagiye ahatwa ibibazo mu buryo bwashoboraga kumara amasaha umunani ku munsi, ndetse yari yarabujijwe kongera kubonana no kuvugana n’umugore we, Carole.

BBC

IZINDI NKURU
Ibitekerezo(0)
Tanga Igitekerezo