Utuntu n’Utundi

Minisitiri w’intebe wiyemeje guca uburaya

Minisitiri w’intebe wiyemeje guca uburaya

Minisitiri w’intebe wa Espagne, Pedro Sanchez, ku cyumweru yijeje ko agiye guhindura uburaya icyaha mu gihugu.

Abwira abamushyigikiye bo mu ishyaka ry’Abasosiyalisti ku musozo wa kongere yaryo y’iminsi itatu muri Valencia, Sanchez yavuze ko uburaya buhindura abagore "abacakara".

Uburaya bwavanywe mu byaha muri Espagne mu 1995 maze mu 2016 UN/ONU ivuga ko muri icyo gihugu ibikorwa byo kwigurisha byinjiza miliyari €3.7 (agera kuri miliyari $4.2).

Ibarura ryakozwe mu 2009 ryerekanye ko muri Espagne umugabo umwe kuri atatu yishyuye akagura igitsina.

Gusa, indi raporo yatangajwe mu 2009 yavuze ko iyo mibare yaba igera ahubwo kuri 39%.

Mu 2011 inyigo ya ONU yashyize Espagne ku mwanya wa gatatu mu bihugu bibamo uburaya kurusha ibindi ku isi inyuma ya Thailand na Puerto Rico.

Ubu, muri Espagne nta mategeko agenga ikorwa ry’iyo business, nta n’amategeko ahana abagurisha umubiri wabo ku nyungu z’amafaranga, bipfa kuba bidakorewe ku karubanda. Gusa gukora nk’umuhuza w’ugura n’uwigurisha bihanwa n’amategeko.

Ubushabitsi bwo kwigurisha bwateye imbere cyane kuva byakurwa mu byaha, bigereranywa ko abagore 300,000 muri Espagne bigurisha nk’indaya.

Mu 2019, ishyaka rya Sanchez nabwo ryari ryatangaje mu migabo n’imigambi yaryo ko rizasubiza uburaya mu bihanwa n’itegeko, icyo benshi babonye nk’ibyari bigamije kwishakira amajwi mu bagore batora.

Inyandiko y’imigabo n’imigambi yabo yavugaga ko uburaya ari "bumwe mu buryo bubi cyane bw’urugomo rukorerwa abagore."

Ariko imyaka ibiiri nyuma y’amatora, nta n’umushinga w’itegeko ryo guhana uburaya uratangwa.

Abashyigikiye ubutegetsi buriho muri Espagne bavuga ko bwahaye inyungu nini abagore bakora ubwo bucuruzi kandi bahawe umutekano.

Ariko mu myaka ya vuba impungenge zakomeje kwiyongera kubera abagore bashorwa mu bucuruzi bw’igitsina.

Mu 2017, polisi ya Espagne yabohoye abagore 13,000 mu bitero byo kurwanya icuruzwa ryabo, ivuga ko nibura 80% byabo habaga hari undi muntu uri kubashora muri ako kazi batabishaka.

BBC

TANGA IGITEKEREZO

Ibitekerezo(0)