Utuntu n’Utundi

Iran: Abagabo bacyekwaho ’gucuruza abana kuri Instagram’ bafunzwe

Iran: Abagabo bacyekwaho ’gucuruza abana kuri Instagram’ bafunzwe

Abagabo batatu batawe muri yombi muri Iran bacyekwaho kugerageza kugurisha abana babiri ku rubuga rwa Instagram.

Brigadiye Jenerali Hossein Rahimi ukuriye polisi mu murwa mukuru Tehran yavuze ko umwe muri abo bana yari amaze iminsi 20 avutse. Undi we yari amaze amezi abiri.

Aba abana bari bamaze kugurwa ku giciro cy’amadolari 500 y’Amerika (ni ukuvuga agera hafi ku 500,000 mu mafaranga y’u Rwanda), bakaba bari barimo gusubizwa ku giciro kiri hagati y’amadolari y’Amerika 2,000 na 2,500.

Bivugwa ko umwe muri abo bagabo batawe muri yombi yavuze ko yakuraga "abo bana mu miryango ikennye" nuko "akabaha imiryango ifite ubushobozi bwo kubategurira ejo hazaza heza".

Brigadiye Jenerali Rahimi yabwiye ibitangazamakuru byo muri icyo gihugu ko abapolisi bamenyeshejwe ibijyanye n’"amatangazo yamamaza kuri Instagram yo kugurisha abana".

Abapolisi baza gutahura "amapaji ari hagati ya 10 na 15" nk’ayo yo ku rubuga rwa Instagram, nuko basanga abana babiri bafitwe n’abagabo batatu baje gutabwa muri yombi, nkuko akomeza abivuga.

Abo bana bashyikirijwe imiryango ifasha abatishoboye.

Bwana Rahimi yavuze ko abo bacyekwaho gushaka kugurisha abo bana bavuze ko bari barabaguze mu miryango ikennye, babaguze ku "giciro gito".

Muri videwo yatangajwe n’ibiro ntaramakuru Young Journalists’ Club, umwe muri abo bagabo yagize ati: "Ibi byari gufasha aba bana kugira ejo hazaza heza".

Ubu si bwo bwa mbere abategetsi muri Iran batahuye ibintu nk’ibi.

Mu ntangiriro y’uyu mwaka, polisi ikorera mu mujyi wa Gorgan yatangaje ko yataye muri yombi abagore bane n’umugabo umwe ivuga ko bari bamaze igihe bashakisha abagore b’abakene batwite bakabarihira amafaranga y’ibitaro, ubundi bagatwara abana babo bamaze kubabyara.

Mu mwaka wa 2016, Shahindokht Molaverdi, Visi Perezida wa Iran ushinzwe ibibazo by’umuryango n’abagore, yavuze ko ahangayikishijwe n’icyo yise "umubare uri hejuru" w’abagore bitegura kubyara bagurisha abana babo.

Visi Perezida Molaverdi yavuze ko abagore barimo guhatirwa gukora ibyo kubera "impamvu zitandukanye", zirimo ubukene, kugirwa imbata n’ibiyobyabwenge, gushaka bakiri abana ndetse no kutagira aho kuba.

BBC

TANGA IGITEKEREZO

Ibitekerezo(0)