Miliyoni 44 zishobora kwandura Covid-19 mu mwaka umwe muri Afurika - OMS

Ishami ry’umuryango w’abibumbye ryita ku buzima (OMS/WHO) riburira ko abantu bagera ku 190,000 bashobora gupfa muri Afurika mu mwaka wa mbere w’icyorezo cya coronavirus niba ingamba z’ingenzi zo kukirwanya zitagize icyo zigeraho.

Ubushakashatsi bushya bwa OMS bunateganya ko iki cyorezo gishobora gukomeza kubaho mu myaka micye iri imbere.

Matshidiso Moeti, ukuriye OMS ishami ry’Afurika, yagize ati: "Bishoboka ko [coronavirus] izakomeza kwenyegeza ubwandu [ivuye] mu bice yagize indiri".

Impuguke za OMS zivuga ko uku kwandura gacye gacye ivaha ahantu hamwe ijya ahandi ari uburyo bw’umwihariko kuri Afurika ugereranyije no mu bindi bice by’isi.

Ibindi byibanzweho ni uko uyu mugabane ugizwe ahanini n’urubyiruko "rwungukiye mu kuba indwara zandura zararwanyijwe zirimo nka VIH [HIV] n’igituntu", ndetse n’gipimo kiri hasi cy’impfu.

Uku kubirira kwa OMS kuje mu gihe igihugu cya Nigeria gituwe cyane kurusha ibindi muri Afurika, ndetse n’ibice bimwe by’Afurika y’epfo na Côte d’Ivoire, byatangiye kudohora ingamba zimwe za ’guma mu rugo’.

Ubushakashatsi bwa OMS bwasanze ko abantu bari hagati ya miliyoni 29 na miliyoni 44 mu karere ikoreramo muri Afurika bashobora kwandura Covid-19 mu mwaka wayo wa mbere kuri uyu mugabane.

Abari hagati ya 83,000 na 190,000 bashobora gupfa muri icyo gihe cy’umwaka, nkuko OMS ikomeza ibivuga.

Uko gucishiriza gushingiye ku guteganya, kandi kwibanda ku bihugu 47 byo mu karere ikoreramo muri Afurika kabarirwamo abaturage bagera kuri miliyari imwe.

Ibihugu bya Misiri, Libya, Tunisia, Maroc, Eritrea, Sudan, Somalia na Djibouti ntabwo birimo.

Ku mugabane wose w’Afurika hamaze gutangazwa abarenga 2,000 bishwe na Covid-19, nkuko imibare y’ikigo cyo kurwanya no gukumira indwara muri Afurika ibigaragaza.

Ukoze igereranya, abantu 140,000 imaze kubica mu Burayi bw’uburengerazuba aho iyi virusi yatangiye gushegesha mu byumweru byinshi mbere y’Afurika.

Mu bihugu byose by’Afurika usibye muri Lesotho, hamaze gutangazwa abemejwe ko banduye coronavirus.

Muri Afurika, Afurika y’epfo ni yo ifite umubare munini cyane w’abemejwe ko banduye - 8,895 barimo 178 yishe na 3,153 bayikize - naho muri Algeria ni ho imaze kwica umubare munini, abantu 488, nkuko imibare ya Kaminuza ya Johns Hopkins yo muri Amerika ibigaragaza.

Mu itangazo yasohoye, Dr Moeti, wa wundi uhagarariye OMS muri Afurika, yagize ati:

"Covid-19 ishobora kubana natwe mu buzima bwacu bwo mu myaka myinshi iri imbere niba nta ngamba zo gukumira zifashwe na za leta nyinshi zo mu karere [k’Afurika]".

"Ducyeneye gupima, gutahura abahuye n’abanduye, gushyira mu kato no kuvura".

BBC

IZINDI NKURU
Ibitekerezo(0)
Tanga Igitekerezo