Ubuzima

FDA yaburiye abanyarwanda kudakoresha chroloquine bibwira ko yabarinda Coronavirus

FDA yaburiye abanyarwanda kudakoresha chroloquine   bibwira ko yabarinda Coronavirus

Ikigo gishinzwe kugenzura ibiribwa n’imiti mu Rwanda (Rwanda Food and Drugs Authority), kirasaba Abaturarwanda kutihutira kugura imiti isanzwe ikoreshwa mu bundi buvuzi bakeka ko ivura cyangwa ikingira Covid-19, kandi bitaremezwa n’inzego zibishinzwe.

FDA ibwira abaturage ko imiti yo mu bwoko bwa chroloquine atari imiti ivura coronavirus, ko kuyikoresha mu buryo itagenewe bibujijwe.

Imiti ivugwa n’iki kigo FDA ni; chloroquine, hydroxychloroquine na azithromycin.

Mu bihugu bitandukanye, hari aho bagiye bemeza ko uyu muti waba uvura iyi virus.

Ku mbuga nkoranyambaga hari amakuru yakwiriye y’abavuga ko umuti wa chloroquine iyo uvanzwe na azithromycin bishobora kwica iyi virus ya covid-19.

Gusa kugeza ubu, ishami ry’umuryango w’abibumbye rishinzwe ubuzima ku isi, OMS, ntiriremeza ko iyi miti ivura cyangwa irinda iyi ndwara.

Ikigo FDA cyo mu Rwanda mu itangazo cyasohoye kivuga ko "iyi miti itaremezwa n’inzego zibishinzwe ko ivura cyangwa irinda coronavirus (Covid-19).

Iki kigo kivuga ko imwe muri iyo miti isanzwe ikoreshwa mu kuvura indwara mu Rwanda, ariko ko kuyikoresha mu buryo butagenwe bibujijwe.

Kivuga kandi ko iyi miti itangwa gusa iyo herekanywe urupapuro rwa muganga wayandikiye umurwayi.

Mu gihe gito gishize, Perezida Donald Trump wa Amerika yumvikanye avuga ko chloroquine ’ikiza iyi virus’, gusa aya makuru ntabwo yemejwe n’ikigo gishinzwe imiti muri Amerika.

Umuhanga mu by’imiti wikorera mu Rwanda, yabwiye BBC ko umuti wa Chloroquine wakoreshwaga mu myaka ishize mu kuvura malaria ubu utakiboneka ku isoko mu Rwanda kubera imiti igezweho iyivura.

Avuga ko umuti wa hydroxychloroquine ugurishwa mu Rwanda, ufatwa n’abantu bagiye ahantu bakeka ko hari malaria nk’uburyo bwo kwikingira.

Naho umuti wa Azithromycin - nawo usanzwe ku isoko ry’u Rwanda - ni umuti wo mu bwoko bwa ’antibiotics’ nk’uko uyu muhanga mu by’imiti abivuga.

TANGA IGITEKEREZO

Ibitekerezo(0)