Ubuzima

Ebola yageze n’i Bukavu, umwe yahise imwica

Ebola yageze n’i Bukavu, umwe yahise imwica

Ishami ry’umuryango w’abibumbye ryita ku buzima OMS ryemeje ko mu gace ka Mwenga mu ntara ya Kivu y’Epfo muri Repubulika ya Congo hari umugore n’umwana we basanzemo indwara ya Ebola.

Aba ni abantu ba mbere basanzemo indwara ya Ebola muri iyi ntara.

Ebola imaze umwaka yaradutse muri Kivu ya ruguru mu duce twa Beni na Butembo ndetse no mu mujyi wa Goma. Kugeza ubu imaze guhitana abantu barenga 1800.

OMS ivuga ko ubwo aba bantu bari bamaze gukekwaho Ebola mu ijoro ryakeye abashinzwe ubuzima bahise batabara ngo bavurwe, bashaka abakoranyeho nabo batangira on gukingira.

OMS iremeza ko umugore we iyi ndwara yaje kumuhitana, gusa umwana we w’amezi arindwi ubu akaba ari kuvurwa.

Umugore wishwe na Ebola i Mwenga bikekwa ko yari amaze iminsi avuye ku rugendo rurerure i Beni akagaruka iwe aciye i Goma na Bukavu mu nzira y’amazi agafata inzira isubira Mwenga.

Mu kiganiro n’abanyamakuru kuri uyu wa gatanu, guverineri w’intara ya Kivu y’epfo Theo Ngwabije avuga ko abantu bamenyekanye ko bakoranyeho n’uyu mugore hamwe n’abamushyinguye ubu bakingiwe.

Abandi bantu barwaye Ebola babonetse nyuma y’uko kuwa kabiri w’iki cyumweru abashinzwe ubuzima muri Congo berekanye umugore n’umwana we bavuwe bagakira Ebola i Goma muri Congo.

Kuri uwo munsi kandi Dr Sabue Mulangu inzobere muri Ebola, yabwiye BBC ko aba bombi bakijijwe n’imiti ya Ebola iri kugeragezwa yagaragaje ko ku bantu 681 bayifashe 60% bari kukira Ebola.

TANGA IGITEKEREZO

Ibitekerezo(0)