Ebola yageze muri Uganda

Ishami ry’umuryango w’abibumbye ryita ku buzima (OMS) ryemeje ko umwana w’umuhungu w’imyaka itanu y’amavuko w’i Kasese mu burengerazuba bwa Uganda yanduye indwara ya Ebola.

Uyu ni we muntu wa mbere wemejwe ko yanduye Ebola muri iki gihugu, mu gihe mu gihugu gituranyi cya Repubulika ya Demokarasi ya Kongo ho imaze guhitana abantu hafi 1400 kuva mu kwezi kwa munani umwaka ushize.

BBC dukesha iyi nkuru itangaza ko abantu barenga 2000 bamaze gutangazwa ko banduye Ebola muri Kongo mu mezi 10 ashize itangajwe ko yahadutse.

Bivugwa ko uwo mwana w’umuhungu wo muri Uganda yari yambutse umupaka ku cyumweru ava muri Kongo ari kumwe n’abo mu muryango we.

Abategetsi bavuga ko yahise ajyanwa mu bitaro muri Uganda nyuma yaho yari yagaragaje ibimenyetso birimo kuruka amaraso.

Nyuma ku munsi w’ejo ku wa kabiri, ikigo cya Uganda gipima za virusi cyemeza ko koko uwo mwana w’umuhungu yanduye Ebola, mbere yuko biza gutangazwa n’abategetsi.

Itangazo rihuriweho ryasohowe na minisiteri y’ubuzima muri Uganda ndetse OMS, rivuga ko impande zombi zohereje itsinda ry’ubutabazi bwihuse ngo ritahure abandi bafite ibyago byo kwandura Ebola.

Mu kiganiro n’abanyamakuru ejo ku wa kabiri, Minisitiri w’ubuzima wa Uganda, Dr. Jane Ruth Aceng, yavuze ko abo mu muryango w’uwo mwana bari gukurikiranwa, barimo na babiri bagaragaza ibimenyetso bijya gusa n’ibya Ebola.

Nyuma yaho, yatangaje ubutumwa ku rubuga nkoranyambaga rwa Twitter avuga ko ubu iki gihugu cyagiye "mu bihe bidasanzwe" kubera iyi ndwara.

Iryo tangazo rya minisiteri y’ubuzima ya Uganda na OMS ryongeraho ko Uganda isanzwe yarakingiye Ebola abakora mu bikorwa by’ubuvuzi bagera hafi ku 4700.

Ebola ni ndwara ki?

  1. Ebola ni virusi itangira itera umuntu guhinda umuriro, gucika intege cyane, kubabara imitsi no kubabara mu muhogo.
  2. Uko irushaho gukomera, uyirwaye araruka, agacibwamo ndetse akavira imbere ndetse akava n’amaraso mu bice byo hanze by’umubiri.
  3. Abantu bayandura iyo bagize aho bahurira n’abayirwaye, nk’ahari igikomere ku mubiri, mu kanwa no mu mazuru, mu maraso, mu myanda iva mu mubiri cyangwa mu cyuya cy’uyirwaye.
  4. Abarwayi ba Ebola akenshi bahitanwa n’umwuma ndetse no kunanirwa gukora kw’ingingo zimwe na zimwe z’umubiri.
IZINDI NKURU
Ibitekerezo(0)
Tanga Igitekerezo