Ubutegetsi bwa Repubulika ya Demokarasi ya Kongo bwamenyesheje ko bwa mbere habonetse umurwayi ufite Ebola mu mujyi wa Goma utuwe n’abantu barenga miliyoni.
Uyu mujyi uhana imbibi n’umujyi wa Gisenyi mu burengerazuba bw’u Rwanda.
Minisiteri y’ubuzima yamenyesheje ko hari umupasitoro wasuzumwe bagasanga afite iyi ndwara ubwo yari ageze i Goma ejo ku cyumweru aje n’imodoka itwara abagenzi.
Iyi minisiteri ariko ivuga ko ibyago ko iyi ndwara iza gukwirakwira muri uyu mujyi biri ku kigero cyo hasi.
Abantu barenga 1,600 bamaze kwicwa na Ebola kuva yakwaduka mu burasirazuba bwa Kongo mu mwaka ushize.
BBC dukesha iyi nkuru itangaza ko uyu mupasitoro yageze i Goma avuye kuri kilometero 200 i Butembo, aha hakaba hari abantu bafashwe n’iyi ndwara.
Itangazo rya minisiteri y’ubuzima ya Kongo rigira riti: "Kubera uburyo uyu murwayi yabonetse akanashyirwa mu kato vuba, ibyago ko iyi ndwara ikwirakwira mu mujyi wa Goma biri hasi".
Biravugwa ko umushoferi n’abagenzi 18 yari atwaye baza gukingirwa kuri uyu wa mbere.
Umujyi wa Goma umaze igihe witeguye guhangana n’iyi ndwara.
Umujyi wa Gisenyi mu Rwanda bisa n’ibifatanye, nawo hashize igihe witegura guhangana na Ebola mu gihe yahagera.
Ebola yandura iyo umuntu akoranyeho n’inyamaswa cyangwa umuntu uyirwaye, cyangwa akoze ku murambo w’uwo yishe.
Yandura vuba kuko amatembabuzi yose kandi macye y’uyirwaye ashobora kwanduza utayirwaye uyakozeho.
