Ishami ry’umuryango w’abibumbye ryita ku buzima (OMS/WHO) ryatangaje umubare wa mbere munini ku munsi w’abanduye coronavirus bashya ku isi, 307,930 bayanduye mu masaha 24 ashize.
OMS ivuga ko abishwe na coronavirus ku isi biyongereyeho abarenga 5,500, bituma abo imaze kwica ku isi barenga 923,000.
Ubwiyongere bwinshi bw’abanduye bwabonetse mu Buhinde, Leta Zunze Ubumwe z’Amerika na Brazil.
Kugeza ubu ku isi abantu barenga miliyoni 28 ni bo bamaze kwandura coronavirus, kimwe cya kabiri cyabo ni abo ku mugabane w’Amerika.
Umubare wabanje w’ubwiyongere bwinshi bw’abanduye bashya ku munsi bwari bwabonetse ku itariki ya 6 y’uku kwezi kwa cyenda, ubwo OMS yatangazaga abantu bashya 306,857 banduye Covid-19 ku isi.
Ni hehe ubwandu burimo kwiyongera cyane ?
Nkuko OMS ibitangaza, ejo ku cyumweru Ubuhinde bwatangaje abantu bashya 94,372 banduye coronavirus.
Bukurikiwe na Amerika ahanduye abantu 45,523 na Brazil aho abantu 43,718 banduye kuri uwo munsi.
Mu masaha 24 ashize muri Amerika no mu Buhinde hatangajwe abantu bashya barenga 1,000 bishwe na Covid-19, mu gihe Brazil yatangaje ko abantu bashya 874 bapfuye bivuye ku burwayi bufitanye isano na Covid-19.
Ubuhinde ni cyo gihugu cya kabiri ku isi gifite umubare munini w’abemejwe ko banduye coronavirus - barenga 4,800,000 - bukurikira Amerika ifite abarenga 6,500,000, nkuko imibare ya Kaminuza ya Johns Hopkins ibigaragaza.
Mu cyumweru gishize, Ubuhinde bwatangaje ko abantu hafi miliyoni ebyiri ari bo banduye Covid-19 mu kwezi kwa munini - umubare wa mbere munini ku isi w’abanduye ku kwezi kuva iki cyorezo cyatangira.
Nkuko imibare ya leta y’Ubuhinde ibigaragaza, muri rusange muri uko kwezi handuye abantu 64,000 ku munsi - bangana n’ubwiyongere bwa 84% ku banduraga ku munsi muri rusange mu kwezi kwa karindwi.
Kuva uku kwezi kwa cyenda kwatangira, buri munsi abicwa na Covid-19 mu Buhinde bagera ku 1,000.
Muri Brazil abamaze gutangazwa ko banduye Covid-19 barenga 4,300,000, uyu ukaba ari wo mubare wa gatatu munini ku isi.
Ni cyo gihugu gifite umubare munini w’abamaze kwicwa na Covid-19 muri Amerika y’amajyepfo, abarenga 130,000.
Amerika yihariye hafi kimwe cya kane cy’abanduye Covid-19 bose ku isi, ubu ifite abarenga 6,500,000.
Mu kwezi kwa karindwi, Amerika yagize kwiyongera kw’abandura ku munsi, ariko kuva icyo gihe abandura ku munsi bagenda bagabanuka.
Ni cyo gihugu cya mbere ku isi gifite umubare munini w’abatangajwe ko bishwe na Covid-19, aho imaze kwica abarenga 194,000.
BBC
