Ibiro bya minisitiri w’intebe w’Ubwongereza byatangaje ko Boris Johnson bamusanzemo Covid-19.
Bivuga ko afite ibimenyetso byoroheje kandi azaguma mu kato aho akorera muri Downing Street.
Kuri Twitter, Bwana Johnson yanditse ati: "Mu masaha 24 ashize nagize ibimenyetso byoroheje bansuzumye bansangamo coronavirus.
"Ubu nishyize mu kato, ariko nzakomeza kuyobora guverinoma mu nama kuri video dukomeze kurwanya iyi virus".
Nyuma ya Boris Johnson, umunyamabanga wa leta ushinzwe ubuzima mu Bwongereza Matt Hancock nawe yatangaje ko bamusanzemo iyi virus.
Bwana Hancock nawe yavuze ko afite ibimenyetso byoroheje kandi ari gukorera akazi mu rugo rwe aho ndetse ari mu kato.
Ejo kuwa kane nimugoroba nibwo Bwana Johnson yagaragaye imbere y’ibiro bye nawe akomera amashyi ibiro bishinzwe kurwanya iyi ndwara mu Bwongereza.
Mu ntangiriro z’uku kwezi, Nadine Dorries, umudepite akaba n’umuyobozi mukuru wo muri minisiteri y’ubuzima mu Bwongereza, bamupimye basanga afite coronavirus.
Mu Bwongereza habarwa abantu barenga 11,600 banduye iyi ndwara, muri bo yishe 578 naho abayikize ni 135.
BBC
