Minisiteri y’ububanyi n’amahanga y’Ubushinwa yahakanye amakuru avuga ko iki gihugu gitanga amakuru atari yo ku cyorezo cya coronavirus.
Raporo y’umuryango w’Ubumwe bw’Uburayi yatangajwe mu cyumweru gishize ivuga ko hari "ibimenyetso bihagije" byo guhisha ibikorwa by’Ubushinwa ku mbuga nkorayambaga.
BBC dukesha iyi nkuru itangaza ko inzego z’umutekano mu Bwongereza no muri Amerika zivuga ko Ubushinwa bukomeje gutangaza amakuru agabanyije kandi atari yo ku bandura n’abicwa na Covid-19.
Uyu munsi kuwa mbere mu kiganiro n’abanyamakuru, Geng Shuang umuvugizi wa minisiteri y’ububanyi n’amahanga y’Ubushinwa yahakanye ibyo bivugwa.
Yagize ati: "Ubushinwa buramagana guhimba no gukwiza amakuru atari yo bikozwe n’umuntu cyangwa urwego. Ubushinwa sibwo buvuga amakuru atari yo ahubwo nibwo buvugwaho amakuru atari yo".
Covid-19 yabonetse bwa mbere mu mpera z’umwaka ushize i Wuhan mu Bushinwa ikwirakwira ku isi vuba kuko ubu imaze kugera mu bihugu 185.
Kaminuza y’ubushakashatsi ya Johns Hopkins ivuga abamaze kumenyekana banduye iyi ndwara ku isi ari abantu miliyoni 2,989,090 ikaba imaze kwica abagera kuri 207,431.
