Abaminisitiri 4 banduye Coronavirus muri Burkinafaso

Abaminisitiri bane muri Burkinafaso banduye Coronavirus nkuko byemezwa n’umuvugizi wa Guverinoma y’icyo gihugu ndetse umubare w’abamaze kwandura ukomeje kuzamuka cyane.

Abo baminisitiri bamaze gufatwa n’icyo cyorezo ni Alpha Barry w’Ububanyi n’amahanga, Oumarou Idani , Minisitiri ushinzwe amabuye y’agaciro n’umutungo kamere, Stanislas Ouaro , Ministiri w’Uburezi ndetse na Simeon Sawadogo w’ubutegetsi bw’igihugu. Ibi byemejwe n’umuvugizi wa Guverinoma ya Burukinafaso kuri uyu wa Gatandatu tariki 21 Werurwe 2020.

Alpha Barry, Minisitiri w’Ububanyi n’amahanga muri Burkinafaso we yanabinyujije kuri Twitter ku wa Gatanu nijoro yemeza ko bamusanzemo Coronavirus.

Abandi uko ari batatu bo bemeje ibi bivugwa banyujije ubutumwa bwabo ku rubuga rwa Facebook.

Kugeza ubu umubare w’abamaze kwandura iki cyorezo muri Burkinafaso wavuye kuri 40 ugera kuri 64 ari nacyo gihugu gifite abantu banduye benshi muri Afurika y’i Burengerazuba.

Guhera kuri uyu wa Gatandatu tariki 21 Werurwe 2020, Guverinoma y’icyo gihugu yamaze gufata ingamba zikaze zo guhagarika ikwirakwira ry’icyo cyorezo harimo gufunga imipaka ku butaka no mu kirere ndetse no gukuraho amahuriro ashobora guhuriza abantu 50 hamwe.

IZINDI NKURU
Ibitekerezo(0)
Tanga Igitekerezo