Abahanga muri siyansi bo muri Australia bavuga ko batahuye ukuntu ubwirinzi bw’umubiri burwanya virusi ya Coronavirus ( Covid-19 ).
Ubushakashatsi bwabo bugaragaza ko abantu bari koroherwa ubu bwoko bushya bwa coronavirus nkuko boroherwa ibicurane bisanzwe.
Bwasohotse ejo ku wa kabiri mu kinyamakuru cy’ubushakashatsi mu buvuzi cya Nature Medicine journal.
Gutahura utunyangingo nyirizina tw’ubwirinzi bw’umubiri turwanya Covid-19 byanafasha mu gukora urukingo rw’iki cyorezo, nkuko impuguke zibivuga.
Ku isi ubu harabarurwa abarenga 200,000 bamaze kuyandura naho abarenga 8,000 imaze kubica.
Profeseri Katherine Kedzierska, umwe mu bakoze ubwo bushakashatsi, yagize ati:
"Ibi twagezeho ni ingenzi kuko ni bwo bwa mbere twumvise mu by’ukuri uburyo ubwirinzi bwacu bw’umubiri burwanya ubu bwoko bushya bwa coronavirus".
Ubu bushakashatsi bw’abo bahanga muri siyansi bo mu kigo Peter Doherty Institute for Infection and Immunity cyo kuri Kaminuza ya Melbourne (University of Melbourne), bwashimagijwe n’izindi mpuguke.
Umwe muri izo mpuguke zindi yavuze ko ari "igikorwa cy’ingenzi kigezweho".
Ni iki cyavumbuwe ?
Hari abantu benshi bakize Covid-19, bivuze ko byari bisanzwe bizwi ko ubwirinzi bw’umubiri w’umuntu bushobora kwica burundu iyo virusi.
Ariko ubu noneho ku nshuro ya mbere, ubushakashatsi bwavumbuye amoko ane y’utunyangingo turwanya Covid-19.
Twatahuwe bakurikirana umurwayi wari urwaye byoroheje iyo virusi kandi utari usanzwe afite ubundi burwayi.
Uwo mugore w’imyaka 47 y’amavuko wo mu mujyi wa Wuhan mu Bushinwa, yari yagiye ku bitaro byo muri Australia. Yayikize mu gihe cy’iminsi 14.
Profeseri Kedzierska yabwiye BBC ko itsinda ry’abashakashatsi bagenzi be basuzumye "uburyo bwose uko bwakabaye bw’uko ubwirinzi bw’umubiri burwanya iyo virusi" muri uwo murwayi.
Iminsi itatu mbere yuko uwo mugore atangira koroherwa, utunyangingo twihariye twabonywe mu maraso ye.
Ku barwayi b’ibicurane cyangwa ’influenza’, utwo tunyangingo nabwo nubundi tugaragara muri icyo gihe mbere yuko abarwayi bakira, nkuko Profeseri Kedzierska yabivuze.
Madamu Kedzierska yabwiye BBC dukesha iyi nkuru ati: "Twashimishijwe cyane n’ibyo twagezeho mu bushakashatsi bwacu - n’ukuntu mu by’ukuri twashoboye gufata ifoto yuko utunyangingo tw’ubwirinzi bw’umubiri tugaragara muri uwo murwayi mbere yuko atangira koroherwa".
Yongeyeho ko byafashe ibyumweru bine abahanga muri siyansi barenga icumi ngo bagere kuri iryo sesengura.
Ibi birafasha iki ?
Gutahura igihe utunyangingo tw’ubwirinzi bw’umubiri tuhagerera bishobora gufasha "guteganya aho iyo virusi izaca".
Ibi bivugwa na Profeseri Bruce Thompson, umukuru w’ishami rya za siyansi z’ubuzima kuri Kaminuza ya Swinburne University of Technology yo muri Australia.
Profeseri Thompson yabwiye BBC ati: "Iyo uzi igihe ibikorwa bitandukanye byo guhangana nayo bibera, ushobora guteganya aho ugeze ukira iyo virusi".
Greg Hunt, Minisitiri w’ubuzima wa Australia, yavuze ko ibyavuye muri ubwo bushakashatsi binashobora "kwihutisha" urukingo ndetse n’uburyo bwo mu gihe kiri imbere bwo kuvura abarwaye Covid-19.
Profeseri Kedzierska yavuze ko ubu igikurikiyeho kuri we n’abo bahanga muri siyansi bagenzi be ari ugutahura impamvu uko ubwirinzi bw’umubiri w’umuntu burwana n’iyo virusi bigira intege nke kurushaho ku bo yashegeshe.
Ati "Ubu rwose ni ikintu cy’ingenzi gusobanukirwa n’ikibura cyangwa igitandukanye ku barwayi bapfuye cyangwa abo yashegeshe - kugira ngo tumenye uburyo twabarinda".
Mu kwezi kwa mbere uyu mwaka, icyo kigo cya Peter Doherty Institute for Infection and Immunity cyabaye icya mbere gishoboye kwigana muri ’laboratoire’ uko iyo virusi iteye, cyo hanze y’Ubushinwa.
Kuva icyo gihe, cyahawe indi nkunga y’inyongera na leta ya Australia ndetse n’imfashanyo ivuye ahandi hatandukanye, harimo n’iyo cyahawe na Jack Ma, umuherwe wo mu Bushinwa utunze abarirwa muri za miliyari z’amadolari y’Amerika.
