Abahanzikazi ba ‘Gospel’ 11 bishyize hamwe bagiye gukora igitaramo gikomeye

Ku nshuro ya 2 abagore n’abakobwa baririmba indirimbo zihimbaza Imana bagiye gukora igitaramo gikomeye kigamije gukangurira abahanzikazi bo muri ‘Gospel’ kwitinyuka ndetse n’umugore muri rusange kumva ko na we afite ubushobozi bwo kuzamura impano ye no kwiteza imbere.

Ku itariki 14 Ukuboza 2016 nibwo hari habaye igikorwa cyo gutangiza ihuriro ry’aba bahanzikazi bise ‘All In One Gospel Ladies’. Muri iki gitaramo ninabwo hamuritswe ‘DVD’ iriho indirimbo zabo uko ari 11, ku ikubitiro ihita igurwa asaga miliyoni n’igice y’amafaranga y’u Rwanda.

Igitekerezo cyo gushinga umuryango uhiriwemo n’aba baririmbyi b’abagore cyazanwe na Tonzi wavuze ko kigamije guca burundu akajagari mu gucuruza ibihangano by’abahanzi nta burenganzira. Indi ntego ‘All In One Gospel Ladies’ igamije ni uguha imbaraga abahanzi mu byiciro byose kuva ku bakizamuka kugeza ku bamaze gukomera bityo ngo bose barusheho gushinga imizi kandi babone amafaranga afatika.

Ku itariki 05 Werurwe 2017 nibwo hateganyijwe igitaramo cya 2 kizahuza aba bahanzikazi aribo: Aline Gahongayire, Diana Kamugisha, Pastor Rose Ngabo, Assumpta uzwi ndirimbo ‘Satura ijuru’, Alice Tonny, Giselle Phanny, Karen, Rachel Rwibasira, Pastor Jackie Mugabo, Gabi Kamanzi ndetse na Tonzi ari na we wagize igitekerezo cyo gutangiza iri tsinda. Iki gitaramo kizabera kuri ‘Ubumwe Grande Hotel’ iherereye mu Mujyi wa Kigali rwagati. Kwinjira bizaba ari 10.000 FRW ndetse na 5.000 FRW.

Tonzi yatangarije rwandamagazine.com ko intego yabo ikomeye ari ukuzamurana kw’abahanzikazi hagati yabo.

Ati “ Nkuko dukora Edition ya mbere , twari twemereye abantu ko hazabaho niya 2, iya 3, ...ubu tugiye gukora edition ya 2 kandi n’izindi zizaza kandi buri yose izajya iba ifite umwihariko. Kizaba ari igitaramo gikomeye kuko twese hamwe twariteguye bihagije kandi abazaza tuzafatanyiriza hamwe kuramya no guhimbaza Imana mu buryo bwimbitse.

Yunzemo ati “ Intego ya mbere nuguhura tugahuza impano zacu turamya Imana, tuzamura icyubahiro cy’Imana, tugashyigikirana mu mpano Imana yaduhaye kuko tuziko ’Unity is power’ .”

Tonzi yongeyeho ko bashyize iki gitaramo muri Werurwe ku itariki 5 kubera ko bifuzaga kubihuza n’umunsi w’abagore wizihizwa buri wa 8 werurwe.

Tonzi ati" Uzaba ari umwanya wo kugaragaza ko gushyira hamwe byadufasha kugera kuri byinshi nk’abari n’abategarugori ,ninabwo tuzashyira ku mugaragaro indirimbo ’ Woman of Honor’."

Igitaramo kizahuza aba bahanzikazi giteganyijwe ko kizatangira ku isaha ya saa kumi n’imwe z’umugoroba ku itariki yavuzwe haruguru. Hazanerekanwa indirimbo nshya z’amashusho z’aba bahanzi.

Abari bitabiriye itangizwa rya ‘All In One Gospel Ladies’

Abahanzikazi uko ari 11 ubwo baririmbaga mu itangizwa ku mugaragaro rya ‘All In One Gospel Ladies’

Icyo gihe abitabiriye bafatanyije na ‘All In One Gospel Ladies’ guhimbaza no kuramya Imana

Tonzi ubwo yasobanuraga ahavuye igitekerezo cyo kwishyira hamwe kwabo

Abari aho bagaragazaga ibyishimo

Ku itariki 5 Werurwe 2017 nibwo hazaba ’Edition’ ya 2

IZINDI NKURU
Ibitekerezo(2)
  • henry

    fake sana

    - 20/02/2017 - 08:41
  • Bella

    Nanjye nkunda cyane abantu bishyira hamwe. Nimukomereze aho turabashyigikiye rwose

    - 20/02/2017 - 11:08
Tanga Igitekerezo