Mukunzi Yannick na Rutanga Eric bakinira Rayon Sports bari batawe muri yombi mu ijoro ryakeye, bamaze kurekurwa. Polisi yatangaje ko bari bagiye kubazwa ngo bafashe ubugenzacyaha kuri dosiye y’umutoza wabo Karekezo Olivier.
Polisi y’igihugu yanyujije ubutumwa kuri Twitter yayo bugira buti "Abakinnyi babiri ba Rayon Sports, Rutanga Eric na Mukunzi Yannick nta byaha bakurikiranyweho. Bari bitabye Police gufasha ubugenzacyaha mw’iperereza ry’ibanze kuri dosiye ya Karekezi Olivier, nyuma barataha."
Karekezi Olivier yatawe muri yombi tariki 15 Ugushyingo 2017 akurikiranyweho ibyaha yakoze yifashishije itumanaho n’ikoranabuhanga nkuko biheruka gusobanurwa n’umuvugizi wa Polisi, Theos Badege.
Yannick Mukunzi na Rutanga Eric ni bamwe mu bakinnyi Rayon Sports yifashishije ikina na Mukura VS kuri iki cyumweru ku kibuga cya Kicukiro. Ni umukino amakipe yombi yanganyije 0-0. Nyuma yaho nibwo bafashwe mu bihe 2 bitandukanye. Mukunzi Yannick yatawe muri yombi akiva gukina uwo mukino naho Rutanga bamuta muri yombi ku isaha ya saa tanu z’ijoro.
Nyuma y’itabwa muri yombi kwa Yannick na Rutanga , Rayon Sports yari yanditse isaba Ishyirahamwe ry’umupira w’amaguru mu Rwanda, FERWAFA ko umukino yari ifitanye n’Amagaju kuri uyu wa Kabiri wakwigizwayo kuko yari ifite ibibazo binyuranye birimo no kugira abakinnyi bake. FERWAFA yemeye ubusabe bwayo. Itariki uzakinirwaho izatangazwa mu minsi iri imbere.
Inkuru bijyanye:
Ntirenganya Alfred
Byari bibabaje ndetse biteye agahinda kugirango umuntu ave muri match ataranaruhuka wumve ngo ari kuri Police?? Mukunzi na Rutanga turabakunda kdi turabashyigukiye Imana yacu ndetse na Rayon ntiyakwemera ko hari ikibi kibagetaho