Musanze FC yanditse amateka iba ikipe ya mbere ikingiwe Covid-19 mu Rwanda (AMAFOTO)

Abakinnyi, abatoza n’abandi bagize ‘staff technique’ mu ikipe ya Musanze FC bakingiwe Covid-19 kuri uyu wa gatandatu tariki 6 Werurwe 2021.

Mu gitondo cyo kuri uyu wa gatandatu ni bwo abakozi b’ikipe ya Musanze FC bazindukiye ku Bitaro bya Ruhengeri aho bahawe urukingo rwa koronavirusi agakoko gatera indwara ya Covid-19 imaze iminsi yoreka imbaga ku isi.

Ni igikorwa abakinnyi ba Musanze bitabiriye nyuma y’umunsi umwe Leta y’u Rwanda itangije mu gihugu hose gutanga urukingo rwa Covid-19 byatangiriye ku bantu bafite ibyago byinshi byo kwandura iyi ndwara kurusha abandi harimo abaganga, abajyanama b’ubuzima, abarengeje imyaka 65, abasanganywe indwara zidakira n’abandi barimo n’abacuruzi.

Abasaga ibihumbi 50 barakingiwe hirya no hino mu gihugu.

Mu bakingiwe ku ikubitiro ku munsi w’ejo hashize, harimo na Perezida wa MusanzeFC bwana Tuyishimire Placide n’ukuriye abafana bayo bwana Nsanzumuhire Dieudonne ‘Buffet’.

Uyu munsi rero, hari hatahiwe abakinnyi ba Musanze FC.

Inkoko ni yo ngoma!!! Aba bose nta we usigaye, bazindukiye ku Bitaro bya Ruhengeri maze barakingirwa banaba ikipe ya mbere y’umupira w’amaguru ndetse no mu yindi mikino yose mu Rwanda bakingiwe Covid-19 yagiye ihagarika ibikorwa bya siporo rusange n’ubu imikino myinshi ikaba itari yasubukurirwa.

Musanze FC yari ku mwanya wa kabiri n’amanota 6 mu mikino ibiri yakinnye mbere y’uko shampiyona y’umwaka w’imikino 2020-2021 ihagarikwa nyuma y’aho inzego zibishinzwe zisanze hari amakipe aturabahirizaga ingamba zo kwirinda Covid-19 byanateye abakinnyi b’amwe mu makipe bandura iki cyorezo.

Ubwo umunyezamu Shema yakingirwaga

Kyambade Fred (ubanza), Ibra, Ntaribi Steven, Munyeshyaka Gilbert ’Rukaku’ na Shema bamaze gukingirwa

IZINDI NKURU
Ibitekerezo(0)
Tanga Igitekerezo