Rutahizamu Moussa Camara wahoze muri Rayon Sports ategerejwe mu Rwanda kuri uyu wa Gatandatu tariki 24 Ukwakira 2020 aho agarutse gukinira iyi kipe ifite abafana benshi mu Rwanda.
Moussa Camara wigeze kunyura muri iyi kipe akayivamo muri Kamena 2017 ategerejwe mu Rwanda kuri uyu wa Gatandatu tariki 24 Ukwakira 2020 saa tatu z’ijoro. Aje gushyira umukono ku masezerano yamaze kumvikana na Rayon Sports. Azazana na Oumar Sidibe usanzwe akinira iyi kipe mu kibuga hagati ariko akaba yari yaragiye iwabo mu biruhuko.
Mbere yo kuva muri Rayon Sports, uyu rutahizamu ukomoka muri Mali yasize ayifashije gutwara igikombe cya Shampiyona cya 2017. Uwo mwaka yayitsindiye ibitego 10 mu mikino 19.
Yahise yerekeza muri Ismaily Sporting Club yo mu Misiri aguzwe ibihumbi mirongo itanu by’Amadolari ya Amerika (50.000$).
Muri 2018, Camara yerekeje muri MO Béjaïa yo muri Algeria , ayimaramo umwaka umwe. Muri 2020 yasinyiye Sohar SC yo muri Oman ari nayo yari agikinira.
Moussa Camara aje yiyongera ku bandi bakinnyi b’abanyamahanga Rayon Sports yamaze kugura harimo Mannasseh Mutatu wavuye muri Gasogi United na Jean Vital Ourega ukina mu kibuga hagati Rayon Sports yatijwe na TP Mazembe.
