Imikino

Marines FC yatsinze APR FC mu mukino wakinwemo ibice BITATU [Amafoto]

Marines FC yatsinze APR FC mu mukino wakinwemo ibice BITATU [Amafoto]

Mu cyumweru cye cya mbere, mu kazi ke gashya, umutoza Zlatko Krmpotić birashoboka ko atari byo yari yiteze n’ubwo hari mu mukino wa gicuti. Uyu munya-Serbia waje gutoza APR FC, yatsinzwe na Marines FC ibitego 3-2 mu mukino w’ibice bitatu wabereye i Shyorongi kuri iki Cyumweru.

Gukina ibice bitatu by’umukino, buri kimwe kimara iminota 30 biri mu byaranze uyu mukino wa gicuti warimo ishyaka ryo ku rwego rwo hejuru hagati y’aya makipe ya girikare. Marines FC yiganjemo abakinnyi bakiri bato, batangiye bahererekanya ndetse babona uburyo bwiza bw’umupira wahinduwe na Samba Cedrick, Mugisha Patrick ashyizeho umutwe, uca hejuru y’izamu ryarimo Ntwari Fiacre. Bidatinze, Samba Cedrick yongeye guhindura undi mupira imbere y’izamu, uyu waje kuvamo igitego cya mbere cyatsinzwe na Tuyishime Benjamin.

Iranzi Jean Claude na Nizeyimana Mirafa bagerageje amashoti ku ruhande rwa APR FC, ariko imipira bakayinyuza hejuru y’izamu ryarimo Ahishakiye Hertier. Mu minota ya mbere y’agace ka kabiri, Marines FC yabonye igitego cya kabiri cyatsinzwe na Mugisha Benjamin n’umutwe ku mupira wari uvuye mu ruhande rw’ibumoso, uhinduwe na Samba Cedrick, usanga uyu rutahizamu ahagaze wenyine, awuterekana mu nguni y’izamu rya Fiacre. APR FC yishyuriwe igitego cya mbere na Nshuti Innocent ku munota wa 42 w’umukino, ku mupira wari uvuye muri coup-franc yatewe na Iranzi Jean Claude.

APR FC yari yiganjemo abakinnyi nka Butera Andrew, Itangishaka Blaise, Danny Usengimana na Nshuti Innocent yihariye iminota myinshi y’iki gice ariko kongera kubona izamu bibabera imbogamizi dore uko Marines FC bari bahagaze neza mu bwugarizi. Blaise yateye ishoti rikomeye rigana mu izamu, umupira uramutenguha, uca ku ruhande.

Mu gace ka nyuma, umutoza Zlatko Krmpotić yashyizemo abakinnyi benshi biganje mu ikipe yari isanzwe ari iya mbere bari basigaye hanze, uhereye ku munyezamu Kimenyi Yves, Muhadjiri Hakizimana, Byiringiro Lague na Nshuti Dominique Savio, ikipe yari iyobowe na Ngabo Albert. Aba babanje kubaka, bashaka igitego cyo kwishyura, iki kiza kuboneka mu minota ya 76 ubwo Byiringiro Lague yashyiraga umupira mu rushundura nyuma yo guherezwa na Issa Bigirimana, umupira wari uvuye kuri Muhadjiri.

Aha, hari nyuma y’iminota mike n’ubundi Lague acenze ba myugariro babiri ba Marines, ashatse gutsinda mu nguni, umupira ugarurwa n’izamu. Marines FC yahise itsinda igitego cy’intsinzi nyuma y’iminota itatu, gitsinzwe na Nyirinkindi Saleh wahuraga n’ikipe yavuyemo, ni nyuma y’uko yari amaze gukorerwa ikosa na Nshuti Savio Dominique.

Amakipe yombi yiteguraga imikino ya shampiyona yo kwishyura izatangira hagati muri uku kwezi. APR FC izerekeza i Nyamagabe gukina n’Amagaju FC tariki ya 18 mu gihe ku munsi uzakurikiraho, Marines FC izerekeza mu Bugesera.


N. Clement, Donna, N. Blaise, B. Omar, M. Patrick, I. Christian, Samba Cedrick, T. Benjamin (c), D. Ramadhan, A. Hertier (GK) na Fiston.


H. Rugwiro, N. Mirafa, I. Ramadhan, N. Evode, B. Prince, Iranzi J.C (C), n. Moustapha, R. Denis, N. Fiacre (GK), I. Blaise na M. Yves.


Ubwugarizi bwa APR FC bwarimo Rugwiro Herve na Prince bwagowe cyane n’abakinnyi b’imbere ba Marines


Rukundo Denis ntiyorohwe ku ruhande rw’ibiryo n’abasore bakina ibumoso ba Marines


Denis agerageza gucenga Samba Cedric

Mugunga Yves ntiyorohwe na ba myugariro ba Marines mu minota 30 yakinnye


Danny Usengimana, Nshuti Innocent, Butera Andrew na Nkkinzingabo Fiston binjye basimbura mu gace ka kabiri


Blaise Itangishaka yakinnye ibice bibiri by’uyu mukino


Abafana ba APR FC bibumbiye mu itsinda rya Online Fan Club Zone 5 bahaye ikaze umutoza Zlatko, na Marines ........


Iragire Ramadhan ukina ibumoso. Myugariro wavuye mu Burundi


Danny Usengimana mu mwambaro wa APR FC


Dusingizemungu wamazeho umusatsi ni umwe mu bakinnyi bitwaye neza muri uyu mukino





Saleh Nyirinkindi wakiniye APR FC, agerageza gucenga Nshuti Savio Dominique


Byarangiye Savio akoreye ikosa kuri Saleh wamukuruye ikabutura


Ngabo Albert na Savio bahagaze mbere y’uko Marines batera coup-franc yavuyemo igitego cya gatatu


Umutoza Yves Rwasamanzi yatsinze APR FC yanyuzemo


Abakinnyi ba APR FC bari bamaze gusimburwa bareba uko bagenzi babo bari kwitwara


Zlatko Krmpotić atsinzwe bitatu nyuma y’iminsi itatu ahawe akazi!




AMAFOTO: Hardi UWIHANGANYE

TANGA IGITEKEREZO

Ibitekerezo(3)

s
ssamim - 11/02/2019 - 07:22

Umutoza w’umwungiriza abirimo neza disiwe

s
sdhjhjcxjh - 11/02/2019 - 07:53

Ubundi iyo hasifuwe neza, amakipe menshi yatsinda APR, harimo na Marine Fc! Kubera ko wari umukono wa gicuti, Ndagijimana Theogene ntabwo yitabajwe kuko ntabwo byari ngombwa. Icyarebwaga ni urwego APR igezeho kandi nyine ni ruriya kuko hakoreshejwe ukuri.

m
modeste - 11/02/2019 - 15:12

uvuzukuri kbs habayemo gukoresha ukuri kuri Ferwaf fc yabankizindizose