Kiyovu Sports yafashe umwanya wa mbere itsinze Rayon Sports (AMAFOTO)

Ibitego bya Ishimwe Kevin na Emmanuel Okwi byafashije Kiyovu Sports kuyobora Shampiyona nyuma yo gutsinda Rayon Sports 2-0 mu mukino w’umunsi wa karindwi wabereye kuri Stade ya Kigali i Nyamirambo kuri iki Cyumweru.

Emmanuel Okwi utaherukaga gukinira Kiyovu Sports, yari yabanje mu kibuga ndetse yagoye ubwugarizi bwa Rayon Sports yari iyobowe na Youssef Rharb wari wambaye igitambaro cya Kapiteni nubwo Muhire Kevin yari mu kibuga.

Hakizimana Dolphe wagiriwe icyizere cyo gukina umukino wa mbere muri Shampiyona ari mu izamu rya Rayon Sports, yasohotse nabi inshuro ebyiri mu gihe iya gatatu ari yo yavuyemo igitego cya Kiyovu Sports cyinjijwe na Ishimwe Kevin ku munota wa 19 nyuma yo gutera ishoti ari inyuma y’urubuga rw’amahina ku mupira Okwi yateranye umunyezamu.

Iki gitego cyabonetse hashize iminota ine Rayon Sports ibonye uburyo bw’umupira wahinduwe na Nizigiyimana Karim ‘Mackenzie’, ugeze kuri Muhire Kevin atera ishoti ryanyuze hejuru y’izamu.

Kiyovu Sports yashoboraga kubona igitego cya kabiri ku ikosa Mugisha François ‘Master’ yakoreye kuri Emmanuel Okwi, ariko umupira wari uteretse gato inyuma y’urubuga rw’amahina utewe n’uyu Munya-Uganda ukurwamo na Hakizimana Adolphe.

Habura iminota 10 ngo igice cya mbere kirangire, Masudi Djuma utoza Rayon Sports yakoze impinduka ya mbere, Sanogo Suleiman asimbura Mugisha François.

Amakipe yombi yashoboraga kujya kuruhuka anganya, ariko Muhire Kevin yongera guhusha igitego cyabazwe ku buryo bwabonetse ku munota wa 41, umupira mwiza yahinduriwe na Rharb Youssef ashatse kuwudunda mu izamu ujya hejuru.

Rayon Sports yatangiye igice cya kabiri ikora impinduka ebyiri, Iranzi Jean Claude na Manace Mutatatu Mbedi baha umwanya Mujyanama Fidèle na Niyonkuru Sadjati.

Byayifashije gusatira ishaka igitego cyo kwishyura, ariko igorwa n’ubwugarizi bwa Kiyovu Sports bwarimo Ndayishimiye Thierry na Ngendahimana Eric mu gihe umunyezamu Kimenyi Yves yakuyemo umupira ukomeye wa Niyonkuru Sadjati.

Guhererekanya neza kwihuse kw’abakinnyi ba Kiyovu Sports ni ko kwavuyemo igitego cya kabiri ku munota wa 64, aho Benedata Janvier yinjiye mu rubuga rw’amahina, ahindura umupira wanyuze ku munyezamu usanga Emmanuel Okwi wahise agwana na wo mu nshundura.

Amakipe yombi yasatiranye mu minota yakurikiyeho, ariko 90 y’umukino irangira Kiyovu Sports itsinze ibitego 2-0 ndetse ihita iyobora Shampiyona n’amanota 16 mu gihe Rayon Sports ifite amanota 11 ku mwanya wa gatatu, iyanganya na Gasogi United, yo yanganyije na Espoir FC ubusa ku busa mu wundi mukino wabanje i Nyamirambo.

Bugesera FC yagize amanota umunani nyuma yo kunyagirira Marines kuri Stade Umuganda ibitego 6-2.

AS Kigali yanganyije na Musanze FC igitego 1-1 ku wa Gatandatu, ifite amanota 15 ku mwanya wa kabiri mu gihe Police FC yagize amanota 10 ku mwanya wa gatandatu, irushwa rimwe na Musanze FC, nyuma yo kunganya na Gicumbi FC ubusa ku busa.

APR FC ifite ibirarane bine izahuramo na Etincelles, Gasogi United, Mukura Victory Sports na Rutsiro FC, iri ku mwanya wa cyenda n’amanota icyenda.

PHOTO:RENZAHO Christophe

IZINDI NKURU
Ibitekerezo(0)
Tanga Igitekerezo