Ijambo ’Inkomamashyi’ , intandaro y’ihagarikwa rya Martin Rutagambwa

Photo: I buryo hari Martin Rutagambwa wahagaritswe ku mwanya w’ubujyanama mu bya tekiniki wa Perezida wa Rayon Sports, Munyakazi Sadate (hagati )

Kuri iki cyumweru tariki 23 Gashyantare 20020, inama ya komite yaguye y’Umuryango wa Rayon Sports, yafashe ibyemezo bikomeye birimo guhagarika uwari umujyanama wa Perezida wa Rayon Sports, Rutagambwa Martin.

Iyi nama yateranye kuri iki cyumweru, yanaganiriye ku hazaza h’amasezerano iyi kipe yambara ubururu n’umweru ifitanye n’uruganda rwega inzoga n’ibinyobwa bidasembuye rwa Skol.

Inyandikomvugo y’iyo nama ivuga ko "Komite yaguye ya Rayon Sports yemeje amafaranga itazajya munsi mu gihe cy’ubwumvikane na Skol.” Gusa ingano y’ayo mafaranga ntabwo yatangajwe.

Umwanzuro wa kane w’iyo nama uvuga ko "Komite yaguye ya Rayon Sports yasabye Komite Nyobozi ko yakwitonda igashaka umutoza mukuru, bitarenze ku wa Gatanu tariki ya 28 Gashyantare 2020."

Ni nyuma y’uko kuva mu Ukuboza 2019 iyi kipe yatangaje ko yatandukanye mu buryo bwemewe n’amategeko n’umunya-Mexique Javier Martinez Espinoza wayitozaga kuva muri Nzeri uwo mwaka.

Kuva ubwo kugeza uyu munsi Rayon Sports yatozwaga na Kirasa Alain wari umutoza wungirije, gusa ntabwo yemewe n’ishyirahamwe ry’umupira w’amaguru mu Rwanda kuko adafite ibyangombwa bimwemerera gutoza mu cyiciro cya mbere.

Umwanzuro wa gatanu w’inama yabaye kuri iki Cyumweru wo uvuga ko komite yaguye yasabye "Perezida wa Rayon Sports guhagarika umujyanama we wihariye mu bya tekiniki, kubera amagambo yavuze ku buyobozi bwa Rayon Sports."

Intandaro y’amagambo ya Martin ni umukino Rayon Sports yongeye gutsindwamo na Sunrise FC

Tariki 16 Gashyantare 2020 nibwo Sunrise FC yatsinze Rayon Sports mu mukino wo kwishyura wa Shampiyona. Ni mu gihe kandi mu mukino ubanza nabwo yari yayitsindiye i Nyagatare 2-1.

Gutsinda uyu mukino byafashije Sunrise FC gufata umwanya wa karindwi n’amanota 27 mu gihe Rayon Sports ifite amanota 41, yahise itakaza umwanya wa kabiri.

Nyuma y’umukino, mu butumwa Martin Rutagambwa yageneye abagize komite yaguye ya Rayon Sports, yamenyesheje Perezida Sadate asanzwe abereye umujyanama ko gutsindwa uwo mukino byatewe n’impamvu nyinshi zinyuranye yari yanamubwiye ngo na mbere y’umukino harimo aho avuga ko abakikije Perezida Sadate ari abantu b’inkomamashyi.

Ni amagambo Rwandamagazine.com yabonye iyahawe ni umwe mu bantu baba muri komite yaguye ya Rayon Sports utifuje ko umwirondoro we utangazwa. Uwaduhaye amakuru yanongeyeho ko kuva uwo munsi, ayo magambo yababaje cyane abagize komite yaguye ya Rayon Sports, icyo bo bise kurengera no kubahuka abayobozi b’ikipe.

Ubutumwa bwa Martin bwagiraga buti "
Président ukikijwe nabantu binkomamashyi kandi ntabwo bizana insinzi,
1) Dufite staff ituzuye nakubwiye kenshi ko ntaho kirasa yatugeza kuko numutoza mwiza Aliko ni junior ntali kurwego rwo guhanganira ibikombe,ejobundi nateje ubwega hano mbasaba kutemerera kirasa kujya muli négociations zikipe yigihugu mubica amazi,
2semaine duhanganye na Ferwafa, concentration yikipe yose ntayo.
1)ubuyobozi
2)Staff technique
3) abakinnyi
4)Abafana
Résultat tubonye zirabisobanura, niba nkumuyobozi ushaka ko dutwara igikombe, hagomba gufatwa ingamba uhereye mumbere ,kugera kumuharuro,
Kuko ibikombe biraharanirwa
Ngaho mwihangane nimuhindura imyumvire izahindura imikorere
Bonne chance."

Martin Rutagambwa ahagaritswe nyuma y’uko yinjiye muri komite y’ikipe ya Rayon Sports nk’umujyanama wa Perezida mu bijyanye na tekinike mu Ukuboza umwaka ushize, asimbuye Eric Nsabimana.