Ishyirahamwe ry’umupira w’amaguru mu Rwanda ryamaze gutangaza igihe amarushanwa ritegura azasubukurirwa , andi agatangira. Shampiyona y’icyiciro cya mbere y’umupira w’amaguru 2020-2021 mu bagabo igomba gutangira tariki 30 Ukwakira 2020, isozwe tariki 20 Gicurasi 2021 .
Ibi bikubiye mu myanzuro y’inama ya Komite nyobozi ya FERWAFA yateranye tariki 31 Nyakanga 2020, yemeza ingengabihe y’amarushanwa ategurwa n’iri shyirahamwe.
Hemejwe ko amakipe yo mu cyicyiro cya kabiri agomba gukina imikino ya kamalampaka (Play offs) agomba guhatana guhera tariki 2 kugeza kuri 17 Ukwakira 2020 muri Kigali.
Aho imikino izabera hakaba ngo hazatangazwa nyuma gusa ngo ikazakinwa hashyizweho amabwiriza yo kwirinda Covid-19. Ayo makipe azajya akina umukino umwe gusa ntawo kwishyura (single knock-out format).
’Season’ ya 2020/2021 mu cyiciro cya kabiri yo izakinwa guhera tariki 31 Ukwakira 2020, isozwe tariki 29 Gicurasi 2021.
Irushanwa ry’igikombe cy’intwari cya 202 ryo riteganyijwe gutangira tariki 19 Mutarama 2021 , rikazasozwa tariki 1 Gashyantare 2021. Igikombe cy’Amahoro cya 2021 kizatangira muri week end ya tariki 4- 5 Gashyantare 2021, gisozwe tariki 5 Kamena 2021.
Imikino y’umupira w’abagore mu cyiciro cya mbere n’icya kabiri, yo iteganyijwe gukinwa hagati ya tariki 3 Ukwakira 2020 kugeza mu kwezi k’Ukuboza 2020. Ni imikino yo yari yarasubitswe.
’Season’ ya 2021 y’icyiciro cya mbere mu bagore mu bagore yo izatangira tariki 19 Gashyantare 2021 isozwe tariki 31 Nyakanga 2021. Mu gihe icyiciro cya kabiri mu bagore kizatangira tariki 20 Gashyantare 2021 gisozwe tariki 24 Nyakanga 2021.
Kwandikisha abakinnyi ku makipe yo mu cyiciro cya mbere biteganyijwe gutangira tariki 16 Kanama 2020 bikazasozwa tariki 24 Ukwakira 2020. Abo mu cyiciro cya kabiri bizatangira tariki 18 Mutarama 2021 bisozwe tariki 5 Gashyantare 2021.
Muri Shampiyona y’abagabo mu cyiciro cya mbere, APR FC niyo yegukanye igikombe hashingiwe ku myanzuro ya Komite nyobozi ya FERWAFA yafashe tariki 22 Gicurasi 2020aho byemejwe ko hakurikizwa imikino 23 ya Shampiyona yari imaze gukinwa (mbere y’uko Shampiyona isubikwa kubera Covid-19) kuko umunsi wa 24 utarangiye, APR FC yari iyoboye urutonde n’amanota 57 ikaba ariyo yahawe igikombe cya Shampiyona 2019/2020, Gicumbi FC na Heroes FC zimanuka mu cyiciciro cya kabiri.
Ku birebana n’amakipe azazamuka mu cyiciro cya mbere, hemejwe ko hazakinwa imikino ya ’ Play-offs’ kugira ngo amakipe 2 azazamuka mu cyiciro cya mbere muri Season 2020/2021 amenyekane. Amakipe 4 ya mbere mu itsinda A n’aya mbere mu itsinda B niyo azakina iyo mikino.
Shampiyona y’icyiciro cya kabiri yasubitswe Etoile de l’Est iri ku mwanya wa mbere n’amanota 23 ikurikiwe na Vision ifite amanota 18, Rugende FC ya 3 yari ifite amanota 18 , Rwamagana ya kane yari ifite amanota 17 naho Alpha FC yari iya gatanu n’amanota 11.
Imikino ya kamarampaka izahuza amakipe ane ya mbere muri buri tsinda muri abiri yari agize icyiciro cya kabiri. Ayo ni Rutsiro FC, Gorilla FC, Interforce n’Amagaju mu itsinda rya mbere(Intare na Aspor ntabwo zizakina nubwo ari zo ziza imbere ku rutonde).
Mu itsinda rya kabiri ayemerewe gukina kamarampaka ni Etoile de l’est, Vision, Rwamagana na Alpha kuko Rugende ya 3 na yo yasigaye kubera ikibazo cya Club Licencing.
