Imikino

Coronavirus:Stade zo muri Brazil zigiye guhindurwamo ibitaro

Coronavirus:Stade zo muri Brazil zigiye guhindurwamo ibitaro

Amakipe akomeye muri Brazil agiye gutanga Stade zayo ku bashinzwe ubuzima kugira ngo hahinduke ibitaro n’ahavurirwa abantu mu rwego rwo kurwanya icyorezo cya Coronavirus (Covid-19).

Al Jazeera dukesha iyi nkuru itangaza ko kuri uyu wa mbere tariki 23 Werurwe 2020, muri Brazil habarurwaga abantu 1.546 bamaze kwandura iki cyorezo ndetse kikaba kimaze guhitana 25 muri icyo gihugu gituwe n’abagera kuri Miliyoni 210.

Nyuma y’uko Leta ya Brazil ihagaritse imikino y’umupira w’amaguru kugeza igihe hazatangirwa irindi tangazo, ngo amakipe agera ku 10 muri 20 akina icyiciro cya mbere muri icyo gihugu yamaze gutanga Stade zayo ngo zikoreshwe mu kwagura ibitaro mu rwego rwo guhangana na Coronavirus.

Flamengo ifite igikombe cy’amakipe yo muri Amerika y’Epfo nayo yamaze gutangaza ko izatanga Stade yayo Maracana ku bashinzwe ubuzima muri Brazil ndetse binemezwa na Perezida wayo Rodolfo Landim.

Abayobozi bo muri Sao Paulo, Umujyi munini muri Brazil batangaje ko bazashyira ibitanda 200 muri Pacaembu municipal stadium mu rwego rwo kugabanya ubucucike mu bitaro byo muri uwo mujyi.

Ikipe ya Corinthians nayo yatanze Stade yabo ya Itaquerao ndetse n’aho bitoreza ngo abashinzwe ubuzima barebe uko bahakoresha mu kurwanya ikwirakwira rya Coronavirus.

Santos nayo yatangaje ko hari ivuriro riri bushyirwe muri imwe mu nyubako isanzwe ibarizwa muri Vila Belmiro stadium.

Ku wa Gatanu ushize, Luiz Henrique Mandetta , Minisitiri w’Ubuzima muri Brazil yatangaje ko Coronavirus ishobora kuzagira ubukana hagati ya Mata na Kamena uyu mwaka. Kuri we ngo asanga gukwirakwira kw’iki cyorezo bizatangira kugabanuka mu gihugu cyabo muri Nzeri uyu mwaka.

TANGA IGITEKEREZO

Ibitekerezo(0)