Ku munsi wa nyuma w’amatsinda y’irushanwa ryo kurwanya ibiyobyabwenge mu rubyiruko mu Karere ka Musanze, Ikipe y’uruganda rwa CETRAF yatsinze Inyange 3-1 biyihesha itike yo kugera muri 1/2 cy’iri rushanwa.
Ni umukino wabaye ku isaha ya saa kumi kuri iki cyumweru tariki 8 Gicurasi 2022 kuri Stade Ubworoherane. Wabanjirijwe n’uwo Ntagipfubusa yatsinzemo Vijana FC 8-0.
Amakipe 8 niyo yari yiyandikishije gukina muri aya marushanwa. Yagabanyijwe mu matsinda abiri aho irya mbere ryarimo CETRAF, Makamburu, Inyange na Kivuruga mu gihe Itsinda B ryarimo Vijana FC, Nyabihu, Musanze Youth na Ntagipfubusa.
Nyuma y’imikino y’amatsinda izaba mu mpera z’iki cyumweru, hazakurikiraho iya 1/2 mu gihe irushanwa rizasozwa tariki ya 23 Gicurasi 2022.
CETRAF yahise igira amanota 6, muri 1/2 , izahura na Ntagipfubusa FC yazamutse mu itsinda rya kabiri n’amanota 9. Makamburu FC yazamutse ari iya mbere mu itsinda rya mbere n’amanota 9 izahura na Nyabihu FC yazamutse mu itsinda rya kabiri ifite amanota 6.
Abafatanya bikorwa muri iri rushanwa ni Musanze wine, Makamburu wine, Meraneza, Next Bar, Mukungwa River Side Night Club, Ntagipfubusa Ltd, Masita na Canal Plus Musanze.
Ikibazo cy’ibiyobyabwenge mu rubyiruko kiri mu bihangayikishije inzego zitandukanye mu Rwanda kuko hari abo bitera kugira agahinda gakabije.
Inyigo y’Ikigo gishinzwe Ubuzima (RBC) yo muri 2018 igaragaza ko Abanyarwanda barenga ibihumbi 200 biganjemo urubyiruko, bagezweho n’uburwayi bwo mu mutwe biturutse ku kunywa inzoga n’ibindi biyobyabwenge.
Yagaragaje ko abenshi mu bagezweho n’uburwayi ari urubyiruko ruri mu kigero cy’imyaka hagati ya 12-35, ndetse ko 1/2 cy’Abanyarwanda bari muri iki kigero bakoresheje ibiyobyabwenge nibura rimwe mu buzima bwabo.
11 CETRAF FC yabanje mu kibuga
11 Inyange FC yabanje mu kibuga
Abakinnyi ba CETRAF bari bafite inyota yo kugera muri 1/2
Mabe(i buryo), umwe mu bakurikiranira hafi CETRAF FC yari yaje kubashyigikira
Abafana ba CETRAF FC ntibitaye ku mvura yagwaga mu mukino wose
CETRAF FC yatsinze 3-1, yerekeza muri 1/2
