Imikino

Muhitira ntabwo yageze ku ntego yihaye muri shampiyona y’Isi

Muhitira ntabwo yageze ku ntego yihaye muri shampiyona y’Isi

Kuva tariki 27 Nzeri kugeza 06 Ukwakira 2019, i Doha muri Qatar habereye shampiyona y’Isi y’imikino ngororamubiri “IAAF World Athletics Championships 2019”, Muhitira Felicien wari waserukiye igihugu mu kiciro cy’abagabo mu gusiganwa muri Marato (42,1km), yaje gusoreza ku mwanya wa 22.

Muhitira Felicien uzwi ku izina rya ‘Magare’, wakinnye tariki 05 Ukwakira 2019, yaje kuri uyu mwanya nyuma y’uko mu gusiganwa muri Marato (42,1km), akoresheje amasaha 2, iminota 16 n’amasegonda 21 (2h16’21”).

Yarushijwe na Lelisa Desisa ukomoka muri Ethiopia wegukanye umwanya wa mbere iminota igera hafi kuri 16, kuko yakoresheje amasaha 2, iminota 10 n’amasegonda 40 (2h10’40”).

Mosinet Geremew nawe ukomoka muri Ethiopia yaje ku mwanya wa 2 akoresheje amasaha 2, iminota 10 n’amasegonda 44 (2h10’44”) naho Amos Kipruto ukomoka muri Kenya yabaye uwa 3 akoresheje amasaha 2, iminota 10 n’amasegonda 51 (2h10’51”).

Muhitira wari wahagurukanye intego yo kuza mu myanya 8 ya mbere, atangaza ko iyi shampiyona y’Isi iba iri ku rwego rwo hejuru, bityo ko biba bitoroshye kubasha kuyitsinda. Avuga ko n’ubwo yishimira kubasha gukina agasoza iri siganwa, umusaruro yabonye atari wo yashakaga.

Muhitira wari witabiriye iyi shampiyona y’Isi ya 2019, ni nyuma y’uko abonye ibihe “Minima”, abikuye muri Marato ya “Asics Firenze Marathon 2018” yabereye mu Butaliyani tariki 25 Ugushyingo 2018, aha yaje gusoreza ku mwanya wa 5 akoresheje amasaha abiri iminota 14 n’amasegonda 32 (2h14’32”).

Yongeye kandi kubona ibi bihe, ubwo yitwaraga neza mu irushanwa rya marato “Roma International Marathon 2019” yabereye mu Butaliyani tariki 7 Mata 2019, yegukana umwanya wa 6 akoresheje amasaha abiri n’iminota 10 n’amasegonda 58. Yahise anakatisha itike yo kuzitabira imikino Olempike izabera i Tokyo mu Buyapani mu 2020.

Muhitira Felicien yitabiraga iyi shampiyona y’Isi ku nshuro ya kabiri, kuko yanitabiriye iyo mu 2015, yabereye i Beijing mu gihugu cy’u Bushinwa aho mu gusiganwa muri metero ibihumbi 5 yaviriyemo mu majonjora.

Ku rundi ruhande, Mukandanga Clementine waserukiye igihugu muri Marato mu kiciro cy’abagore, yakinnye tariki 27 Nzeri 2019, gusa ntabwo yabashije gusoza kubera ikibazo yagize cy’ubushyuhe bukabije.


Muhitira Felicien utarabashije kugera ku ntego yihaye muri shampiyona y’Isi


Iyi ni yo myambaro yakinanye muri iyi shampiyona y’Isi yabereye i Doha


Aya ni amacupa y’amazi yagombaga kwifashisha muri iyi shampiyona y’Isi ya 2019


Muhitira Felicien uzwi nka Magare yasoreje ku mwanya wa 22 muri shampiyona y’Isi

TANGA IGITEKEREZO

Ibitekerezo(0)