APR FC yatomboye kuzahura na RS Berkane yo muri Maroc mu ijonjora ribanziriza amatsinda ya CAF Confederation Cup rizaba hagati ya tariki ya 26 Ugushyingo n’iya 5 Ukuboza 2021.
APR FC yari ihagarariye u Rwanda muri CAF Champions League, yisanze muri CAF Confederation Cup nyuma yo gusezererwa na Étoile du Sahel mu ijonjora rya kabiri.
Tombola y’uburyo amakipe azahura mu ijonjora rya nyuma rya CAF Confederation, yabaye kuri uyu wa Kabiri i Cairo mu Misiri, yasize APR FC izahura na RS Berkane yo muri Maroc.
Umukino ubanza uzabera mu Rwanda hagati ya tariki ya 26 n’iya 28 Ugushyingo mu gihe uwo kwishyura uzabera muri Maroc hagati ya tariki ya 3 n’iya 5 Ukuboza 2021.
RS Berkane itozwa n’Umunye-Congo Florent Ibengé, yageze muri iri jonjora rya gatatu nyuma yo gusezerera Ben Guerdane yo muri Tunisia ku bitego 5-0.
Ni imwe mu makipe akomeye muri Maroc no kuri uyu mugabane wa Afurika, aho yatwaye CAF Confederation Cup mu mwaka w’imikino wa 2019/20 mu gihe yatsindiwe ku mukino wa CAF Super Cup 2021 na Al Ahly ibitego 2-0.
