Ubushinwa n’Uburusiya byatangaje ko bifite umugambi wo gufatanya kubaka station y’ubushakashatsi mu isanzure ku kwezi.
Ikigo cy’iby’isanzure cy’Uburusiya, Roscosmos, kivuga ko cyagiranye amasezerano n’ikigo nk’icyo cy’Ubushinwa - China National Space Administration (CNSA) - yo kubaka ibikoresho by’ubushakashatsi ku butaka bw’ukwezi, orbit yako cyangwa hombi.
Itangazo ry’ibi bigo byombi rivuga ko iyo station y’ubushakashatsi mu isanzure izaba ishobora no gukoreshwa n’ibindi bihugu.
Bije mu gihe Uburusiya bwitegura kwizihiza isabukuru y’imyaka 60 bwohereje mu isanzure icyogajuru kirimo umuntu.
Iyo ’International Scientific Lunar Station’ izaba ishobora gukora ubushakashatsi bwagutse burimo; kwiga neza no kureba uko ukwezi kwakoreshwa, nk’uko itangazo ry’ibi bigo ribivuga.
Iri tangazo ryanditse mu Gishinwa rigira riti: "Ubushinwa n’Uburusiya bizashyira hamwe ubuzobere bwabyo muri siyansi y’isanzure, ubushakashatsi, ibikoresho n’ikoranabuhanga ry’isanzure mu gutegura kubaka station mpuzamahanga y’ubushakashatsi ku kwezi".
Ryongeraho ko ibi bihugu byombi bizafatanya mu gutegura, gukora imbata y’iyo station, kubaka no kuyobora ibikorwa kuri iyo station.
Chen Lan, ukurikirana cyane porogaramu z’isanzure z’Ubushinwa, yabwiye ibiro ntaramakuru AFP ko uyu mushinga ari "ikintu gikomeye".
Ati: "Uzaba ari wo mushinga mpuzamahanga w’isanzure munini cyane ku Bushinwa, rero ni ibintu bikomeye".
Ubushinwa busa n’aho ari cyo gihangange cyinjiye mu bushakashatsi mu isanzure gikererewe, ariko mu kwezi kwa 12 icyogajuru cyabwo Chang’e-5 cyavanye ku kwezi amabuye n’"ubutaka".
Icyo gihe byabonetse nk’intambwe n’ubushobozi bw’iki gihugu mu bushakashatsi mu isanzure.
Uburusiya, igihugu cyatangije ubushakashatsi mu isanzure, mu myaka ya vuba bwabaye nk’ubusigwa na Amerika n’Ubushinwa muri ibyo bikorwa.
Umwaka ushize, Uburusiya bwatakaje umwihariko wabwo wo kujyana abahanga (astronauts) kuri station mpuzamahanga iri mu isanzure, nyuma y’uko SpaceX ya Elon Musk ibigezeho.
Leta Zunze Ubumwe za Amerika zatangaje umugambi wo gusubira ku kwezi mu 2024. Iyo gahunda yiswe Artemis, izajyanayo umugore n’umugabo ku buso bw’ukwezi, bwaba ari ubwa mbere abantu bahageze kuva mu 1972.
BBC
