Donald Trump yashimye Perezida Buhari wa Nigeria ku guhagarika Twitter

Uwahoze ari Perezida w’Amerika Donald Trump yashimiye Nigeria ku cyemezo yafashe cyo guhagarika urubuga nkoranyambaga rwa Twitter muri icyo gihugu - anasaba ko n’ibindi bihugu bikwiye kubigenza gutyo.

Mu itangazo yasohoye, yagize ati: "Igihugu cya Nigeria cyakoze neza, kuba cyahagaritse Twitter kuko bahagaritse Perezida wabo".

Bwana Trump yashishikarije ibindi bihugu gukurikiza urwo rugero bigahagarika Facebook na Twitter "kubera kubuza kuvuga mu bwisanzure no ku mugaragaro".

Mu kwezi kwa mbere, Bwana Trump yahagaritswe kuri Twitter na Facebook, nyuma yo gushinjwa gutangaza ubutumwa bushishikariza abamushyigikiye kugumuka bagatera inyubako ya Capitol y’inteko ishingamategeko y’Amerika.

Abantu batanu barapfuye bitewe n’iyo midugararo.

Mu itangazo yasohoye ku wa mbere, yibajije niba yagakwiye kuba yarahagaritse Facebook na Twitter mu gihe yari akiri ku butegetsi.

Ati: "Bumva ari bande kugira ngo bagene icyiza n’ikibi kandi na bo ari babi? Wenda nagakwiye kuba narabikoze ubwo nari Perezida.

"Ariko [uwashinze Facebook Mark] Zuckerberg yakomeje kumpamagara ari na ko aza muri White House [ibiro bya perezida] gusangira amafunguro ambwira ukuntu ndi umuntu mwiza".

Ku wa gatanu ushize, Nigeria yahagaritse Twitter gukorera muri icyo gihugu. Yatanze impamvu yo "gukomeza gukoreshwa k’uru rubuga mu bikorwa bishobora kubangamira kwamamara kwa Nigeria".

Uko guhagarikwa kwa Twitter kwabaye nyuma yuko ubutumwa bwa Perezida wa Nigeria Muhammadu Buhari bukuwe kuri urwo rubuga kubera kurenga ku mategeko y’imikoreshereze ya Twitter.

Guhagarikwa kwayo byateje uburakari mu Banya-Nigeria benshi n’ibihugu bikomeye by’i Burayi n’Amerika bivuga ko ibyo biteje inkeke ku iyubahirizwa ry’uburenganzira bwa muntu.

Impande zombi ubu zivuga ko ziri mu biganiro byo gukemura ayo makimbirane.

IZINDI NKURU
Ibitekerezo(0)
Tanga Igitekerezo