Coronavirus: Umuyobozi wa Twitter yemeye gutanga inkunga ya miliyari y’amadolari

Jack Dorsey washinze urubuga rwa Twitter na ’app’ yo kwishyuriraho izwi nka ’Square’, yavuze ko azatanga imfashanyo ya miliyari y’amadolari y’Amerika yo kurwanya coronavirus.

Dorsey avuga ko iyo mfashanyo ingana hafi na 28% by’umutungo we wose.

Yabitangarije kuri Twitter, avuga ko "ibicyenewe biri kurushaho kwihutirwa".

Dorsey ntabwo yasobanuye neza aho iyo mfashanyo izoherezwa mu gufasha kurwanya Covid-19.

BBC dukesha iyi nkuru itangaza ko muri Amerika, hari ikibazo cy’ubucye bw’ibyuma bya ’ventilators’ bifasha abarwayi ba Covid-19 gukomeza guhumeka, ndetse n’ibikoresho byo kurinda abantu bidahagije.

Abanyamerika n’abakora ibikorwa by’ubucuruzi na bo kandi muri rusange bari kugira ibibazo bijyanye n’amikoro.

Dorsey avuga ko azifashisha imigabane afite muri Square mu kubona amafaranga y’iyo mfashanyo, akazayatanga abinyujije mu kigo ’Start Small Foundation’.

Uyu mugabo w’imyaka 43 y’amavuko ni umuyobozi mukuru wa Twitter na Square.

Yavuze ko azifashisha imigabane ye muri Square aho kuba iyo muri Twitter kuko "myinshi" muri yo ari iye bwite.

Iyo migabane avuga ko izagenda itangwa uko igihe gishira, bigashobora kuba hari icyo byahindura ku gaciro kayo ndetse no ku ngano y’imfashanyo yose muri rusange.

Yavuze ko igihe icyorezo cya Covid-19 kizaba "kimaze kuneshwa", iyo mfashanyo izahita ikomereza mu birimo nko gufasha mu buzima n’uburezi bw’abakobwa.

Mu ruhererekane rw’ubutumwa bwo kuri Twitter bugizwe n’ibice bitandatu, Dorsey yavuze ko ashaka gufasha mu nzego azabona icyo zigezeho ku bw’iyo mfashanyo akiriho.

Izo mfashanyo zizatangwa binyujijwe mu buryo abaherwe bakunze gukoresha mu gutanga imfashanyo, ariko bukunze kunengwa kudakorera mu mucyo.

Asa nk’utanguranwa mu kwisobanura, Dorsey yahise atangaza ’link’ ijyana ku nyandiko yo kuri Google izajya igaragaza ku mugaragaro iyo mfashanyo n’uko ikoreshwa.

Si we wenyine

Uyu mukuru wa Twitter ntabwo ari we muherwe wenyine mu ikoranabuhanga utunze za milyari y’amadolari usezeranyije igice cy’umutungo we mu kurwanya coronavirus.

Mark Zuckerberg washinze Facebook yatanze miliyoni 30 z’amadolari, nyinshi muri zo zizakoreshwa mu bikorwa byo gushaka umuti wa coronavirus.

Jeff Bezos, umukuru wa Amazon, yatanze imfashanyo ya miliyoni 100 z’amadolari ku magaburiro rusange (food banks) yo muri Amerika, mu gufasha abashonje muri iki gihe.

Mu kwezi kwa gatatu, Tim Cook ukuriye Apple yatangaje ko kompanyi ye izatanga imfashanyo y’ibikoresho byo mu buvuzi ku Butaliyani bwashegeshwe n’iyi virusi.

IZINDI NKURU
Ibitekerezo(0)
Tanga Igitekerezo