Mu gitondo cyo kuri uyu wa 3 Werurwe, u Rwanda rwakiriye inkingo 240,000 zo gukingira koronavirusi itera Covid-19. Izi nkingo zo mu bwoko bwa AstraZeneca zije muri gahunda ya Covax.
Kuri uyu mugoroba bikaba biteganijwe ko haza kuza izindi 102,960 zo mu bwoko bwa Pfizer.
Rutemikirere yazanye izi nkingo
U Rwanda rufite intego yo gukingira abaturage nibura 30% muri uyu mwaka wa 2021 na 60% nibura mu 2022.
Minisitiri w’ubuzima Dr. Daniel Ngamije aheruka kuvuga ko ubuzima buzongera kuba ubusanzwe nibura ari uko 60% by’abatuye u Rwanda bakingiwe.
Mu gukingirwa, umuntu ahabwa doze ebyiri. Ibi bivuze ko urugero niba ari inkingo 240,000 ziba zigenewe abantu 120,000.
Minisiteri y’Ubuzima ivuga ko mu gukingira bazabanza abantu bari mu byiciro bifite ibyago byo kwandura kurusha. Aba na bo bakaba ari abakozi bo kwa muganga, abarengeje imyaka 65 y’amavuko, abasanganywe izindi zidakira n’abandi bakora mu kazi ko guhangana na Covid-19.
Biteganijwe ko gukingira bitangira kuri uyu wa gatanu, tariki ya 5 Werurwe 2021. Ejo ku wa Kane inkingo zikaba zizoherezwa mu bitaro by’uturere no mu bigo nderabuzima 508 biri hirya no hino mu Rwanda.
Bivugwa ko AstraZeneca ikingira Covid-19 ku kigero cya 62% na ho Pfizer ikayikingira ku kigero cya 95%.
Urukingo rwa AstraZeneca byavuzwe ko ruhendutse ndetse rworoshye kubikwa kuko rushobora kubikwa mu byuma bisanzwe bikonjesha.
Gusa ibihugu bimwe, nka Africa y’Epfo, byakemanze ubushobozi bw’uru rukingo mu gukingira amoko mashya ya Covid-19.
COVAX ni imwe mu nkingi eshatu zashinzwe hagamijwe kwihutisha uburyo bwo kurwanya Covid 19. Ikaba ari gahunda yatangijwe n’Ishami ry’Umuryango w’Abibumbye ryita ku Buzima (OMS) Covid muri Mata umwaka ushize.
Kugeza ubu, ibihugu birenga 180 biri mu bigize ishyirahamwe rya Covax, rishyigikiwe na OMS n’imiryango iharanira ko inkingo zigera kuri bose.
Intego ya Covax ni uguhuriza hamwe ibihugu kugira ngo bigire ubushobozi bukomeye bwo kugura inkingo na kompanyi zizikora.
Ibihugu 92 - biri mu bikennye n’ibifite ubukungu buciriritse - bizabona inkingo zishyuwe ku mari yatanzwe n’abaterankunga.
Ubwo inkingo zageraga ku kibuga cy’indege
U Rwanda ruri mu bihugu bya mbere bya Afurika byakiriye inkingo za Covid-19 binyuze muri Covax kubera ’uko rwitwaye neza’ mu gukumira iki cyorezo
Inkingo za Astrazeneca
Minisitiri w’Ubuzima Dr. Ngamije Daniel avuga ko nihamara gukingirwa 60% mu Rwanda ubuzima buzongera kuba ubusanzwe
Amafoto: RBA
