Mu Rwanda

Covid-19: Bwa mbere mu Rwanda habonetse umubare mwinshi w’abayanduye

Covid-19: Bwa mbere mu Rwanda habonetse umubare mwinshi w’abayanduye

Minisiteri y’Ubuzima mu Rwanda iratangaza ko kuri uyu wa mbere tariki 23 Werurwe 2020 mu Rwanda hagaragaye abandi bantu 17 barwaye Coronavirus. Ibi byatumye umubare w’abarwaye ugera kuri mirongo itatu na batandatu (36).

Muri aba bayanduye, minisiteri y’ubuzima yavuze ko;

  • Abantu icyenda (9) baje baturutse i Dubai
  • Abantu batatu (3) baje baturutse muri Kenya
  • Abantu babiri (2) baje baturutse muri USA
  • Umuntu umwe (1) waje aturutse mu Buhinde
  • Umuntu umwe(1) waje aturutse i Qatar
  • Umuntu umwe (1) watahuwe ko yahuye n’undi wagaragaweho iyi ndwara mu Rwanda.

Nibwo bwa mbere mu Rwanda hagaragaye imibare y’abanduye benshi icya rimwe kuva umuntu wa mbere yabonwaho iyi ndwara kuwa gatandatu tariki 14/03/2020.

Minisiteri y’ubuzima mu Rwanda ivuga ko aba bantu binjiye mu Rwanda batangiye gupimwa no gushyirwa mu kato hagati ya tariki 17 na 20/03/2020.

Aba ngo bari kuvurirwa ahabugenewe mu gihe kandi hashakishwa abahuye nabo kugira ngo basuzumwe kandi bakurikiranwe.

U Rwanda rwafashe ingamba zikomeye zo guhagarika ibikorwa byose n’ingendo z’abantu mu gihugu mu gihe cy’iminsi 14 uhereye mu ijoro ryo kuwa gatandatu ushize.

BBC itangaza ko ingamba nk’izi muri Afurika zatangajwe kandi na Afurika y’Epfo aho zizatangira kubahirizwa kuwa kane w’iki cyumweru saa sita z’ijoro.

Ba Perezida ba Senegal, Cote d’Ivoire na Zimbabwe nabo baraye batangaje ko ibihugu byabo byinjiye mu bihe bidasanzwe kubera iki cyorezo.

Abanduye iyi ndwara ku isi bamaze kurenga 380,000 abo imaze kwica barenze 16,000 naho abamaze kuyikira barenze 102,000.

Mu karere k’ibiyaga bigari u Rwanda na DR Congo nibyo bihugu bimaze kubonekamo abanduye benshi iyi ndwara, byombi ubu birabara 36, muri DR Congo ho imaze kwica abantu babiri.

  • Kenya - 16
  • Tanzania - 12
  • Ethiopia - 11
  • Uganda - 9 (harimo umunani bashya)

Mu Burundi na Sudani y’Epfo nta barwaye iyi ndwara barahaboneka.

TANGA IGITEKEREZO

Ibitekerezo(0)