Imibare mishya ya Minisiteri y’Ubuzima mu Rwanda igaragaza ko abantu babiri aribo banduye Coronavirus (Covid-19) mu masaha 24 ashize mu bipimo byafashwe 923, muri ayo masaha abandi batanu barimo bari basanzwe bavurwa barayikira bituma umure w’abavuwe barakira ugera ku bantu 54 mu Rwanda.
Babiri batangajwe ko banduye kuri uyu wa Gatatu tariki 15 Mata 2020 bose bahuye n’abanduye Coronavirus mu Rwanda.
Umubare w’abantu basanzemo coronacirus ku isi uri kwiyongera vuba, mu minsi 13 ishize bavuye ku bantu miliyoni imwe. Kuri uyu wa Gatatu tariki 15 Mata 2020 bageze kuri miliyoni ebyiri nk’uko biri mu mibare itangwa na kaminuza y’ubushakashatsi ya Johns Hopkins.
Kugeza ubu Coronavirus imaze gufata abarenga Miliyoni ebyiri (2.049.910) ku isi yose. Imaze guhitana 132.840 naho 507.789 nibo bayivuwe barakira.
Leta zunze ubumwe za Amerika nizo zikomeje kuzahara kurusha ibindi bihugu ku isi.
Zifite abantu bagera kuri 614.246 bamaze kumenyekana ko banduye - ni hafi kimwe cya gatatu cy’abanduye bose ku isi - naho 26.064 bishwe n’iyi ndwara.
Ubushinwa, aho iyi ndwara yabonywe mbere mu mpera z’ukwezi kwa 12 umwaka ushize, ubu ni igihugu cya karindwi mu byazahajwe n’iki cyorezo.
Ibihugu by’Iburayi nka Espagne, Ubutaliyani, Ubufaransa, Ubudage n’Ubwongereza byose byamaze guca ku Bushinwa mu banduye n’abishwe n’iki cyorezo.
