Coronavirus: Abandi 11 bakize barasezererwa uyu munsi - Min.Ngamije

Minisiteri y’Ubuzima itangaza ko kuri uyu wa Gatandatu tariki 11 Mata 2020 aribwo hari busezererwe abandi barwayi 11 bakize Coronavirus

Mu kiganiro yari yatumiwemo kuri Televiziyo y’u Rwanda, Minisitiri w’Ubuzima yavuze ko bamaze gupima abantu ibihumbi 8. Aho habonetse abarwaye 118. Hakaba harasezerewe abantu 7 bakize. Uyu munsi hakaba hasesererwa abandi 11 aribyo bituma umubare w’abamaze gukira Coronavirus mu Rwanda uba 18.

Kugeza ubu abanduye Coronavirus mu Rwanda bateguriwe ahantu hihariye bavurirwa ndetse bakitabwaho umunsi ku wundi.

Abaganga bo ku kigo nderabuzizma cya Kanyinya, ahavurirwa abarwaye Covid-19, muri rusange bemeza ko benshi mu barwayi bameze neza, cyane ko bakurikiranwa bihagije, abafite inkorora bakayivurwa, bityo imibiri yabo ikongera ubudahangarwa buyifasha guhangana n’iyo virusi, nk’uko biheruka gutangazwa na Dr. Ernest Ndahayo, umuyobozi w’icyo kigo.

Ibyo kandi byemezwa na bamwe mu barwayi barimo n’abanyamahanga, aho bivugira ko bumva barimo gukira neza, bakaba bashimira byimazeyo Leta y’u Rwanda uburyo yabitayeho.

Tariki 5 Mata 2020 nibwo abarwayi bane ba mbere bakize Coronavirus basezerewe mu bitaro basubira mu miryango yabo.

Ubwo basezererwaga, Minisitiri Ngamije aganira n’abanyamakuru, yavuze ko kuba abo bantu barasezerewe bameze neza ari inkuru nziza ku Rwanda mu kurwanya Covid-19.

Ku birebana no kuvura, Minisitiri Ngamije avuga ko ubu u Rwanda ruvura ibimenyetso binyuranye by’iyo virusi ariko ko nta muti uyivura uremezwa n’Ishami ry’Umuryango w’Abibumbye ryita ku Buzima (OMS) kugeza ubu.

Kugira ngo hemezwe ko umuntu yakize Coronavirus bisaba ko apimwa inshuro zigera kuri 2 nyuma y’iminsi 14 aba amaze avurwa.

Minisitiri Ngamije yatangaje kandi ko kugira ngo basezerere umuntu hari ubwo bisaba gupima inshuro zirenze iziteganyijwe.

IZINDI NKURU
Ibitekerezo(0)
Tanga Igitekerezo