Minisiteri y’Ubuzima mu Rwanda iratangaza ko abamaze gufatwa n’icyorezo cya Coronavirus ubu bamaze kugera kuri 19.
Iyi Minisiteri ivuga ko abantu babiri b’abanyarwanda (umwe w’imyaka 32 n’undi w’imyaka 34) aribo bayisanganywe kuri iki Cyumweru tariki 22 Werurwe 2020.
Abo bayisanganywe ni abagabo babiri bavuye i Dubai , umwe tariki 19 Werurwe, undi tariki 20 Werurwe.
Kugeza ubu umubare w’abamaze kwandura wahise ugera kuri 19.
Ibimenyetso by’iyi ndwara ni inkorora, guhumeka nabi n’umuriro.
Byifashe bite mu Karere ?
Kugeza kuri iki cyumweru, muri aka karere u Burundi ni bwo busigaye butaragerwamo na coronavirus.
Muri Tanzania biyongereye bagera kuri 12 bavuye kuri 6, muri Repubulika ya Demokarasi ya Kongo naho bageze kuri 30 bavuye kuri 23 . Hari n’umugabo imaze kwica muri icyo gihugu.
Perezida John Magufuli yavuze ko umunani muri abo barwayi ari Abanyatanzania naho abandi bane basigaye ari abanyamahanga, avuga ko guhera ejo ku wa mbere, abasura Tanzania bose bavuye mu bihugu byiganjemo coronavirus bazajya bashyirwa mu kato k’iminsi 14 kandi ari bo birihira.
Magufuli yavuze ko iyo ngamba ireba n’Abanyatanzania basubira iwabo.
